"Qarabağ"ın 15 yaşadək komandası (U-15) qış fasiləsindən sonra ilk rəsmi oyununda da darmadağına imza atıb.

Prosport.Az-ın xəbərinə görə, yeni baş məşqçi Vüqar Əsgərlinin çalışdırdığı komanda AFFA U-15 Liqasının XVIII turu çərçivəsində keçirilən "Sərhədçi" İdman Mərkəzinin stadionunda keçən matçda "Kəpəz"lə qarşılaşıb.

Qış fasiləsindən öncəki tur Gəncədə "Ulduz" (Mingəçevir) komandasını 7:0 hesabı ilə darmadağın etmiş "Kəpəz" bu dəfə özü bu aqibətlə üzləşib – 0:7.

Bu matçda 2 dubl rəsmiləşib. Qolları Əli Bəşirov (15, 19), Hüseyn Bayramov (35), Onur Əliyev (45), Kəmaləddin Cəfərli (46) və Riad Qaradağlı (50, 56) qonaqların qapısından keçirib. Xatırladaq ki, tərəflərin sentyabrın 16-da Gəncə mərkəzi stadionunda keçirilən ilk qarşılaşmasında "Qarabağ" bu komandaya 4:2 qalib gəlmişdi.

Turnir cədvəlinin lideri olan "Qarabağ" bu oyundan sonra xallarının sayını 48-ə qaldırıb.

Qeyd edək ki, bundan sonra "Qarabağ" fevralın 5-də Belarusun paytaxtı Minskə yola düşəcək. Orda "Bizim gələcəyimiz" adlı turnirə qatılacaq komanda fevralın 11-də Bakıya qayıdacaq. Bu səbəbdən də XIX turun Saatlı Olimpiya İdman Kompleksində keçirilməli olan "Araz"la görüşü başqa vaxta təxirə salınacaq.