İyunun 1-dən 4-dək Qırğızıstanın paytaxtı Bişkekdə reytinq turniri keçiriləcək.

Prosport.Az xəbər verir ki, “Bişkek Arena”da keçiriləcək yarışda ölkəmizi 11 qadın və sərbəst güləşçi təmsil edəcək.

İyunun 2-də Jalə Əliyeva (57 kq) və Elis Manolova (62 kq) baş məşqçi Semyon Çterevin rəhbərliyi altında mübarizə aparacaq. Növbəti 2 gündə baş məşqçi Xetaq Qazyumovun rəhbərliyi altında sərbəst güləşçilər xalçaya çıxacaq. İyunun 3-də Məhəmmədxan Məhəmmədov (97 kq) çıxış edəcək. Turnirin son günündə isə Əliabbas Rzazadə (57 kq), Hacı Əliyev, Əli Rəhimzadə (hər ikisi 65 kq), Turan Bayramov, Hacımurad Hacıyev, Cəbrayıl Hacıyev (hamısı 74 kq), Əbubəkr Abakarov (86 kq) və Osman Nurməhəmmədov (92 kq) güləşəcək.

Görüşlər hər gün Bakı vaxtı ilə saat 08:30-da başlayacaq. Medallar uğrunda görüşlərə isə 16:00-da start veriləcək.

Qeyd edək ki, Bişkekdə 1-ci kateqoriyalı hakim Elman İsmayılov ədaləti qoruyacaq.