Azərbaycanın qadın idmançısı Gözəl Zutovanın qolu çıxıb.

Prosport.Az-ın məlumatına görə, Bakıda keçirilmiş qazax güləşi üzrə Avropa çempionatında +77 kq çəki dərəcəsində çıxış edən idmançımızın gürcüstanlı rəqibi ilə mübarizədə sol qolu dirsəkdən çıxıb.

O, yarımfinalda polşalı rəqibi ilə birgə döşəyə çıxsa da, güləşməyib. Zutovaya yarımfinalda texniki məğlubiyyət verilsə də, iştirakçı sayı az olması səbəbindən bürünc medala yiyələnib. Gözəlin qolu çıxsa da, yarışdan sonra "Sərhədçi" İdman Mərkəzində avar rəqsi də oynayıb, mükafatlandırmaya da çıxıb. Onun qolunu yalnız xəstəxanada yerinə salıblar.

Qeyd edək ki, sözügedən yarışda qaliblər 1000, gümüş mükafatçılar 500, bürünc medalçılar 250 dollarla mükafatlandırılıb. Azərbaycanın yarışa qatılmış bütün idmançıları medal qazana bilib – 8 qızıl, 5 gümüş və 3 bürünc medal.

Belə ki, Diana Şoranova (65 kq), Şəhanə Alməmmədova (77 kq), Eyvaz Baxşıyev (60 kq), Mirfəttah Seyidəliyev (66 kq), Hacalı Qasımov (74 kq) Adil Adilzadə (82 kq), Ceyhun Hüseynov (90 kq) və Məhəmməd Məmmədzadə (+100 kq) Avropa çempionu olub. Aytac Quluzadə (48 kq), Bəsti Səfərova (52 kq), Ülviyyə Bayramova (56 kq), Fidan Hüseynova (60 kq) və Nəsimi Umbayev (55 kq) gümüş medalla kifayətlənib.

Gözəl Zutovadan başqa, Mərziyyə Sadıqova (70 kq) və Eyvaz Nəsibov (100 kq) bürünc medal qazanıb. Azərbaycan ümumi komanda hesabında 1-ci yeri tutub.

İlkin