Azərbaycanın daha bir yunan-Roma güləşçisi Həsrət Cəfərov Xorvatiyada keçirilən reytinq xarakterli “Zaqreb Open” turnirində bürünc medal qazanıb.

Prosport.Az xəbər verir ki, 67 kq çəki dərəcəsində çıxış edən idmançı bürünc mükafata sahib olub. Bu çəki dərəcəsində qalib isə Ukraynanı təmsil edən olimpiya mükafatçısı Pərviz Nəsibov olub. Son Avropa çempionu və dünya ikincisi Həsrət Cəfərov yeganə məğlubiyyətini məhz Pərvizdən alıb.

Murad Məmmədov (63 kq) yarışda zədələndiyi üçün sonadək mübarizə apara bilməyib. Qadınlardan isə Jalə Əliyeva (57 kq) bürünc medal uğrunda görüşdə uduzub.

Qeyd edək ki, daha əvvəl yunan-Roma güləşçisi Sənan Süleymanov (77 kq) qızıl medal əldə edib. Sərbəst güləşçilərdən isə Əliabbas Rzazadə, Nürəddin Novruzov (hər ikisi 61 kq) və Cəbrayıl Hacıyev (74 kq), həmçinin qadınlarda Alyona Kolesnik (59 kq) bürünc mükafata sahib çıxıb.