Yunan-Roma güləşi üzrə olimpiya mükafatçısı, ikiqat dünya və üçqat Avropa çempionu Rafiq Hüseynovun (87 kq) Xorvatiyada keçiriləcək reytinq xarakterli “Zaqreb Open”də iştirak edəcək millimizin heyətindən çıxarılma səbəbi bilinib.

Prosport.Az-a verilən məlumata görə, 35 yaşlı titullu idmançı dünən sərbəst güləşlə start verilən yarışda xəstələndiyi üçün iştirak etməyəcək.

Bu səbəbdən o, adı yarışdan çıxarılmış Eldəniz Əzizlidən (55 kq) fərqli olaraq, Xorvatiyaya aparılmayıb. Eldəniz yarışdan sonra Zaqrebdə təşkil olunacaq beynəlxalq təlim-məşq toplanışında iştirak edə biləcək.

87 kq çəkidə Azərbaycanı İslam Abbasov təmsil edəcək.

Onu da qeyd edək ki, Rafiq Hüseynovun ötən ilin sonlarında Bakıda keçirilmiş hərbçilər arasında güləş üzrə dünya çempionatında iştirakı gözlənilsə də, adı millinin məşqçilər korpusunun qərarına əsasən heyətdən çıxarılmışdı.