Kata üzrə karate millimizin sabiq üzvü Dorota Balçyarova karyerasını bitirdikdən sonra xəstəxanada işləyib.

Prosport.Az-ın xəbərinə görə, 30 yaşlı Dorota əvvəlcə Urpendə Slovakiya Silahlı Qüvvələrində çalışıb, 2 ay sonra hərbçi kimi Jilina şəhərinə köçürülüb:

“Hərbi forma geyinir, peşəkar hərbçilərlə birgə atıcılıq və digər tədbirlərdə iştirak edir, qərargahda işləyirdim. Atıcılıqda  çox yaxşı idim. Mən kiçik olanda atam məni atıcılıq meydançasına aparırdı. Ona görə də atıcılıqda özümü evdəki kimi hiss edirdim və bundan həzz alırdım”.

Brnoda fitnes-məşqçi kimi ikinci universitet təhsili almışam. Ali təhsilim isə qidalanma terapiyası (dietoterapiya) üzrə olub. Ona görə də 2022-ci ilin aprel ayından Rimavska Sobota şəhər xəstəxanasında qidalanma terapevti kimi işləmişəm".

O, Prosport.Az-a açıqlamasında bildirib ki, hazırda Dubayda işləyir: "Hazırda Birləşmiş Ərəb Əmirliklərinin Dubay şəhərində işləyirəm. Burada fitnes-məşqçiyəm". 

2018-ci ildə Serbiyanın Novi Sad şəhərində keçirilmiş Avropa çempionatında bürünc medal qazanmış Balçyarova Braziliyanın Fortaleza şəhərində baş tutmuş Premyer Liqanın qalibi olub. O daha əvvəl 21 yaşadək karateçilər arasında İspaniyanın Qvadalaxara şəhərində baş tutmuş dünya çempionatının gümüş medalçısı, gənclər arasında üçqat Avropa çempionudur.

Qeyd edək ki, Dorota Balçyarova 2016-cı ilin sonlarında milliləşdirilsə də, 2017-ci ildə Bakıda keçirilən IV İslam Həmrəyliyi Oyunlarından sonra küsərək Azərbaycanı tərk edib. Buna səbəb Balçyarova Azərbaycan çempionu olsa da, milliləşdirilmiş iranlı Neda Rzayinin İslamiadada çıxış etməsi olub. Həmin yarışda medal qazana bilməyən iranlı kataçı isə millət vəkili, ovaxtkı Karate-do Federasiyaları Assosiasiyasının prezidenti, indiki Azərbaycan Karate Federasiyasının rəhbəri Ülvi Quliyevin idmançısı olub.