Bəzi idmançılar Gənclər və İdman Nazirliyinin onlara qarşı etdiyi addımlardan narazıdır.

Prosport.Az xəbər verir ki, Hacı Əliyevin bu barədə öz sosial şəbəkə ünvanlarında Nazirliyi tənqid edən açıqlaması rezonans doğurub. İkiqat olimpiya mükafatçısı, üçqat dünya və dördqat Avropa çempionunun səbir kasasını daşıran amil onun nazirlik tərəfindən 21 dekabrda Azərbaycan Kubokunun 1/8 final mərhələsinin "Qarabağ" – MOİK matçının keçirildiyi Xankəndi şəhərinə aparılmaması olub:

“Bu il ilk dəfə dördqat Avropa çempionu olaraq adımı güləş tariximizə yazdım və Bakıda keçirilən hərbçilər arasında dünya çempionatının qalibi oldum. Amma buna baxmayaraq, Gənclər və İdman Nazirliyi tərəfindən heç bir diqqət görmədim, heç ilin ən yaxşı 10 idmançısı siyahısına belə düşmədim. Cənab Prezidentimiz İlham Əliyev tarixi qələbə qazandığımız gözəl Qarabağımıza idmançıları dəvət edib, orada onlarla görüşdü, idmanı və idmançıları nə qədər sevdiyini bir daha sübut etdi. Amma çox heyif ki, bu görüşə mənim adımı Gənclər və İdman Nazirliyi salmadı, məni cənab Prezidentlə görüşə buraxmadılar. Mən inanıram ki, cənab Prezident məni orada görməyə çox sevinərdi, amma buna şərait yaradılmadı. Bu qədər nəticə qazanmışam, bu qədər qələbələr qazanmışam, amma məni bu tarixi görüşdən məhrum etdilər. Bu haqsızlığa görə inanıram ki, bir tədbir görüləcək. Biz cənab Prezidentimizə güvənirik. Çünki cənab Prezident hər zaman bizim yanımızdadır. Bizlər də hər zaman onun yanındayıq. İnşallah, hədəfim olimpiya çempionu olmaq, ölkəmizə yeni bir qızıl medal gətirməkdir”.

Qeyd edək ki, Hacı Əliyev Xankəndiyə nazirliyin xətti ilə yollanmayıb. Bu qurumdan narazı qalan digər idmançılar da var. Tezliklə, onların da sosial şəbəkə ünvanlarındakı etirazlarını işıqlandıracağıq.