"Gələcəkdə nazirliyin tövsiyəsi olacaq ki, müqavilə müddətləri açıqlansın. Bu baxımdan Faiq Qarayevə müqavilə müddəti barədə verilən sual doğrudur. Futbolda müqavilə müddəti açıqlanmayanda, bəzən müqavilələrə də erkən xitam verilir, heç kimin xəbəri olmur".

Bunu gənclər və idman naziri Fərid Qayıbov Prosport.Az saytının sualını cavablandırarkən bildirib.

O, Gənclər və İdman Nazirliyinin seçimlərində voleybol təmsilçilərinin olmaması ilə bağlı da fikirlərini qeyd edib: "Seçimlərdə hamını xoşbəxt etmək mümkün deyil. Bu seçimlərin 50%-i federasiyalardan, 30%-i sosial şəbəkələrdən, 20%-i nazirliyin kollegial üzvləri tərəfindən açıqlanır. Qeyd olunduğu kimi, seçimlər subyektiv səbəblərdən də bəyənilməyə bilər".

Fərid Qayıbov dağılmaq təhlükəsi ilə üz-üzə qalan "Xarı Bülbül" voleybol komandaları ilə bağlı da suala aydınlıq gətirib: "Klublara sponsorlar tapılması ilə bağlı nazirlik tərəfindən də işlər görülür. Sponsorlar tapılması istiqamətində çalışırıq. "Xarı Bülbül"lə bağlı da eyni situasiyadır. Amma Voleybol Federasiyasının vitse-prezidenti Bəhruz Quliyevin də açıqladığı kimi, klublar mövsümün əvvəlindən öz maliyyə dayaqlarını federasiyaya təqdim edir. Amma hər bir iş görüləndə, düşünülmüş olmalıdır. Xərclər və gəlirlər nəzərə alınmalıdır. Nazirlik büdcə təşkilatıdır, klublara dəstək olmur. Bizim qurum federasiyalar üçün maliyyə bölgüsü aparır, onların idmançılarının dünya və Avropa çempionatlarına ezamiyyətini təşkil edir".

Səbuhi Musa