Azərbaycan Basketbol Liqasında IX turun daha bir oyunu keçirilib.

Prosport.Az xəbər verir ki, Sumqayıt Olimpiya İdman Kompleksində "Sumqayıt" “Gəncə” ilə qarşılaşıb.

Görüş meydan sahiblərinin 95:88 hesablı qələbəsi ilə yekunlaşıb. Ən məhsuldar basketbolçular “Sumqayıt”da Smit Roderik (18 xal, 11 ribaund), “Gəncə”də isə Culs Mur (22 xal, 4 ribaund) olub.

Teymur Hüseynov ("Sumqayıt"ın baş məşqçisi): "Komandamı qələbə münasibətilə təbrik edirəm. Bizim üçün çətin oyun oldu. Hərçənd ilk hissədə çox yaxşı oynadıq. Fasilədə oyunçularıma dedim ki, 2-ci hissədə tabloya baxmayın, meydana çıxırsınızsa, elə bil 0-dan başlayırsınız. Amma yenə də eniş başladı. Yenə də yaradıcılıq və təşkilatçılıqla bağlı problemlər yaşandı. Oyunçularım fərdi oynamağa başladı. Xüsusən də amerikalılar "yorğanı öz üzərinə çəkdi". Yerlilərin çıxışını isə çox bəyəndim. Nəzər Quliyev ümumiyyətlə möhtəşəm oynadı. İsmayıl Əliyevə də "əhsən" düşür. Hətta onlar 40 dəqiqə meydanda oldu. Ona görə əvəzləmədim ki, vacib oyunda çox yaxşı çıxış etdilər. Sadəcə, rəqib çox sayda 3 xallıq atdı. Xal fərqini əridib hətta hesabda önə keçdilər. Amma yenə də toparlanaraq qələbə qazandıq. Diksonun 11 "3-lük" cəhdindən 4-də hədəfi dəqiq nişan almasını isə problemə çevirmək lazım deyil. Onun ayağında zədə var idi. Lenard bizim əsas snayperimizdir. Qarşıda bizi II dövrə gözləyir.  Pley-offa yüksəlmək üçün daha çox qələbə qazanmaq lazımdır. Bizim əsas problemimiz oyuna yaxşı başlayıb sonra sürəti azaltmağımızdır. Bax, bunun üzərində işləməliyik".

Bedri Meriç ("Gəncə"nin baş məşqçisi): “Pley-off yolunda bizimlə birgə mübarizə aparan rəqiblə görüşdə qələbə yaxşı nəticə olacaqdı. Bundan əvvəlki 2 turda qalib gəlməklə irəliləyişə nail olmuşduq. 3-cü addımı da ata bilsəydik, daha yaxşı ola bilərdi. Geridönüş etməyə nail olduq. Fərqi aradan qaldırdıq. Amma təəssüf ki, oyunun sonunda uğurlu ola bilmədik. “Sərhədçi” ilə matçda da eyni şeylər baş vermişdi. Bu gün də hakimlərlə bağlı təkrar hadisələr oldu. Hakimlərin oyunun nəticəsinə bu qədər müdaxilə etməsini doğru görmürəm. Ədalət təmsilçiləri xəta edə bilər. Buna çox adətkaram. Türkiyədə, Avropada bu cür olayları yaşadıq. Eyni epizodda hər komanda üçün fərqli qərarlar verilir. Hakimlərin də bilik və bacarıqlarının artırılmasına ehtiyac var. Çünki biz komanda olaraq əmək sərf edirik, zəhmət çəkirik. Belə səhvlər olduqda nəticə də fərqli olur. “Sərhədçi” ilə oyunda da bir oyunçumuzun meydandan qovulmasına görə görüşü uduzduq. Eyni şeylər indi də təkrarlandı. Bunu başa düşə bilmirəm. Ümid edirəm ki, hakimlər də öz səhvlərindən nəticə çıxarar. II dövrəyə daha yaxşı şəkildə hazırlaşmalıyıq".

Qeyd edək ki, hazırda hər iki komandanın hesabında 12 xal var.