"Qarabağ"ın 15 yaşadək komandası AFFA U-15 liqasında liderliyini məğlubiyyətsiz sürdürür.

Prosport.Az-ın xəbərinə görə, Rakif Əliyevin baş məşqçi olduğu komanda XIII turda "Qarabağ" ən yaxın izləyicisi olan "Sabah"la səfərdə – "ASK Arena"da qarşılaşıb.

Bunadək məğlubiyyətsiz irəliləyən 2 komandanın duelindən nominal qonaqlar qalib ayrılıb – 2:0. Əli Bəşirov 14 və 18-ci dəqiqələrdə dubl edərək "Qarabağ"a 3 xal qazandırıb. Sonuncu – 80-ci dəqiqədə meydan sahiblərindən Renat Muştakov qırmızı vərəqə ilə meydandan qovulub.

Qeyd edək ki, "Qarabağ" hazırda 39 xal toplayıb və şəksiz liderdir. "Köhlən atlar" çempionatda bütün görüşlərdə qalib gələn yeganə komandadır.