"Sabah"ın futbolçusu Anatoli Nuriyev Azərbaycan Premyer Liqasının XV turunun "Kəpəz"lə oyunundan sonra jurnalistlərə müsahibə verib.
Prosport.Az-ın Tovuza ezam olunmuş əməkdaşı həmin müsahibəni təqdim edir:
– 6-cı dəqiqədə fərqləndiniz və 2:0 qalib gəldiniz. Matç haqqında fikirləriniz necədir?
– Çətin oyun alındı. Yaxşı ki, erkən qollar vurduq. Bu, işimizə çox yaradı. Ardıcıl 2 qol vurduqdan sonra qalan dəqiqələrdə oyun bizim üçün yaxşı keçdi. “Kəpəz” pis komanda deyil. Hazırda turnir cədvəlində aşağı pillədə qərarlaşsalar da, heç də pis futbol sərgiləmirlər. Odur ki, nəticədən məmnunuq.
– Demək olar ki, “Sabah” artıq özünə gəlir?
– Ümid edirəm ki, bu qələbənin bizə çox faydası olacaq. Daha da inkişaf etməli, turnir cədvəlində mövqeyimizi yaxşılaşdırmalıyıq. Yüksək yerlər uğrunda mübarizə aparırıq. Ona görə də üst pillələrə can atırıq.
– Son 3 turda nə etmək lazımdır ki, qış tətilinə müsbət notlarda yollanasınız?
– Hər 3 görüşdə qələbə qazanmalıyıq. Düzdür, bu, heç də asan olmayacaq. Çünki çempionatda hazırda heç bir oyun asan keçmir. Amma yenə də əlimizdən gələni edəcəyik ki, xal itkisinə yol verməyək. Həmçinin, “Kəpəz”lə bizi kubok oyununu da nəzərə alsaq, bizim qış fasiləsinə kimi 4 oyunumuz var.
– Son vaxtlar millidə və klubunda daha az oynamaq imkanı əldə edirsiniz. Öz çıxışınızı necə dəyərləndirirsiniz?
– Bu, baş məşqçinin qərarıdır. Mən də bu qərara hörmətlə yanaşmalıyam. Son zamanlar əsas heyətdə daim yer almasam da, məşqlərimi edirəm, tam gücümlə çalışıram. “Kəpəz”lə görüşdə şans qazandım və qol vurdum. Fasilədən sonra necə olacaq, bilmirəm.
– İlk “11-lik”də daim yer almasanız, klubunuzu dəyişmək barədə düşünmürsünüz?
– Mənim klubla hələ ilyarımlıq müqaviləm var. Ona görə də klubumu dəyişmək barədə, yaxud icarəyə verilmək haqda düşünmürəm. Dediyim kimi, mən üzərimə düşəni edirəm, əlimdən gələni edirəm ki, meydanda daha çox vaxt keçirim.
– Son vaxtlar adınız ötən il icarə əsasında oynadığınız sabiq komandanız "Sumqayıt"la da hallanır. Ora yenidən icarəyə getmək məsələsi var?
– Mənə maraqlı deyil.