"Sumqayıt" Azərbaycan Premyer Liqasının XV turunda səfərdə "Turan Tovuz"la 2:2 hesablı heç-heçə edib.
Prosport.Az-ın Tovuza ezam olunmuş əməkdaşı xəbər verir ki, "kimyaçılar"ın ilk qolunun müəllifi olan Elvin Bədəlov matçdan sonra jurnalistlərin suallarını cavablandırıb:
– Tovuzda oynamaq hamı üçün çətindir. Bizə də çətin oldu. Yaxşı ki, tez qol vurduq. 2:0 öndə olanda təzyiq hiss edirdik. 2-ci hissəyə pis başladıq. Təzyiqə bir az dözə bilmədik. Rəqib 15 dəqiqədə 2 qol vurdu. Sonra biz bir az sakitləşdik və oyunumuzu oynamağa başladıq. Qol fürsətlərimiz də oldu. Ədalətli heç-heçə deyə bilərəm. Çətin səfərdə 1 xal da dəyərlidir.
– Mövsümdə ilk qolunuzu vurdunuz. Təəssüratlarınız necədir?
– Düzdür, mərkəz müdafiəçisiyəm, işim qol vurmaq deyil. İlk qolumu vurduğum üçün sevinirəm. Amma nəticə daha önəmlidir. Qələbə qazansaydıq, daha yaxşı olardı. Komanda üçün qələbə qolu olmadı deyə bir az təəssüflənirəm. Eybi yoxdur. Çalışacağıq ki, növbəti oyunlarda qələbə qazanaq.
– Karyeranızda bu, vurduğunuz 3-cü qol idi deyəsən...
– Bəli, təxminən belə bir statistika var. 1 qolu "Neftçi"də olanda vurmuşam. Düzdür, qol sayı çox deyil. Amma əsas işim müdafiə olduğundan, buna o qədər də fikir vermirəm.
– Belə erkən qol vuracağınızı gözləyirdiniz?
– Bəli, gözləyirdik. Biz həmişə ilk dəqiqələrdə aktivik. "Zirə" ilə matçda da startda fürsətlərimiz oldu. Tovuza qəbələ üçün gəlmişdik. Ona görə də erkən qol vurmağımızda təəccüblü bir şey yoxdur, normal haldır.
– Fasilədən sonra 2 qol buraxdınız. Bunun səbəbi rəqibin təzyiqi idi, yoxsa "Sumqayıt" oyuna yaxşı köklənə bilməmişdi?
– Deyərdim ki, bizim konsentrasiyamız bir az itdi. "Turan Tovuz" ilk hissə ilə eyni oyunu oynayırdı. Ucaboy hücumçuları var, onlara uzun ötürmələr verirdilər. Bunu gözləyirdik. Amma təəssüf ki, qarşısını ala bilmədik.
– Qış fasiləsinə 3 tur qalıb. 3-cü yerdəki mövqeyinizi qorumaq üçün nəyə ümid edirsiniz?
– Oyundan-oyuna irəliyə doğru gedirik. Ümidliyik. Düzdür, çətin qrafikdəyik, kubok oyunları da var. Çalışacağıq ki, maksimum xal toplayaq. Necə olacağını görəcəyik.