"Azərbaycan Braziliya Ciu-citsu Klubu" İctimai Birliyinin təşkilatçılığı ilə Heydər Əliyev ili çərçivəsində müxtəlif yaş qrupları və müxtəlif çəki dərəcələrində olan 16 komanda, 170-ə yaxın idmançı uşaq, yeniyetmə və gəncin güclərini sınadığı klublar və filiallararası Respublika turniri keçirilib.

Prosport.Az-ın xəbərinə görə, tədbirdə rəsmi qonaq qismində Braziliya Federativ Respublikasının Azərbaycandakı Fövqəladə və Səlahiyyətli səfiri Emanuel Monteneqru iştirak edib.

Tədbir hər iki ölkənin himninin səsləndirilməsi ilə açıq elan olunub. Tədbiri açıq elan edən "Braziliya Ciu-citsu Klubu" İB-nin prezidenti Aqil Acalov çıxışı zamanı idmanın ölkənin daxili inkişafında və beynəlxalq səviyyədə tanınmasında rolundan danışıb. Həmçinin Heydər Əliyevin idmanın bugünki dinamik inkişafına təkan verən bünövrə əhəmiyyətli fəaliyyətlərindən danışan İB prezidenti onun bu müstəsna və əhəmiyyətli siyasətini unutmamalı olduğumuzu vurğulayıb.

Klubun sədri Fuad Kərimov da öz növbəsində bu kimi turnirlərin silsilə şəkildə keçirilməsinin vacibliyindən danışaraq idmançılara həm turnirdə, həm də bütün idman fəaliyyətlərində uğurlar arzulayıb. O bildirib ki, bu kimi tədbirlərin təşkilinin davamlı olması üçün daim çalışırlar.

Braziliya Ciu-citsu döyüş sənətinin Azərbaycanda banisi Taleh Həsənov qonaqları və turnir iştirakçılarını salamlayaraq bu kimi tədbirlərin davamlı keçirilməsinin əhəmiyyətindən danışıb. Eyni zamanda, o, potensiallı idmançılarımızın çoxluğunun sevindirici hal olduğunu bildirib.

Səfir Emanuel Monteneqru çıxışı zamanı ölkəmizdə Braziliya döyüş sənətinin bu qədər geniş tədris və təbliğ olunmasından dolayı minnətdarlığını və Azərbaycan – Braziliya idman əlaqələrinin qarşılıqlı qaydalı olmasından və əməkdaşlıqdan məmnunluq duyduğunu bildirib. Yarışların sonunda qaliblər medal, sertifikat və mükafatlarla təltif olunub.