"Zədəli oyunçularımız var deyə, rotasiyalar edə bilmirik. Bəzi oyunçularımıza çox güc düşür. Uzun səfər idi, yol amili də var idi. Bütün çətinliklərə baxmayaraq, 2-ci hissənin ilk 10 dəqiqəsini çıxmaq şərtilə komanda yaxşı oynadı. Komandadan razı qaldıq. Düzdür, qələbə qazanmaq istəyirdik, amma əlimizdən çıxdı. Bir xala da şükür".

Prosport.Az xəbər verir ki, bu sözləri "Sumqayıt"ın məşqçisi Mübariz Orucov Premyer Liqanın XV turunun "Turan Tovuz"la (2:2) oyundan sonra keçirilmiş mətbuat konfransında deyib.

– 2:0 hesabını niyə qoruya bilmədiniz?
– 2-ci hissənin ilk 10 dəqiqəsində konsentrasiya itkinliyi idi, ya nə idi... Rəqibin də təzyiqi oldu. Diqqətsizlikdən 2 qol buraxdıq. Amma sonradan komanda yenidən toparlandı.

– Qələbənin əldən çıxmasında əsas günahkar məşqçilər korpusudur, yoxsa futbolçular?
– Günahkar axtarmağa ehtiyac yoxdur. Səhv olubsa, hamımızındır. Komanda pis oynamadı, normal çıxış etdi.

– Dediyiniz həmin 10 dəqiqədə nə baş verdi?
– Onu oyuna analiz edəndə, baxacağıq. Hansı səhvlər etdiyimizi görəcəyik. Soyuq başla hamısını analiz edəcəyik.

– Demək olar ki, oyunun ədalətli nəticəsi elə heç-heçə idi?
– 2:0 qalib gəldiyimiz oyunda sonradan 2:2 olursa, 3 xalın əldən çıxmağına üzülürük. 2-ci hissə başlayan kimi ardıcıl 2 qol buraxıb, oyunu 2:2 başa vurursansa, onda da 1 xalın sevinci var.

– "Sumqayıt" çempionatda ardıcıl 5-ci oyundur ki, uduzmur. Bu, komandanın mövsümdəki hədəflərinin dəyişməsinə səbəb ola bilər?
– Mövsüm başlayandan hansısa hədəfimiz yox idi. Komandanın yaxşı futbol oynamasını, yaxşı yerlərdə olmasını istəyirdik. Zaman keçdikcə, komanda öz oyununu tapdıqca, əlbəttə, istərdik ki, avrokuboklara düşək. Amma indidən bu barədə danışmaq çox tezdir. Cəmi 15 tur geridə qalıb. Turnir cədvəlində də xal fərqləri çox deyil. 1-2 oyunda uduzanda, 7-8-ci pilləyə yuvarlanmaq mümkündür.

– Qış fasiləsinə 3 tur qalıb. Transfer siyahısı hazırdır? Bununla bərabər, komandadan göndəriləcək oyunçular da bəllidir?
– Bunlar barədə düşünürük. Kimlərlə müqavilə müddəti uzadılmayacaq, o haqda da fikirləşirik. Hansısa çətinliklərimiz ola bilərsə, onların qarşısını almağa çalışacağıq.

– "Sumqayıt" ölkə xaricinə yollanacaq?
– Bu dəqiqəyə olan fikrimiz ölkə xaricində toplanış keçməkdir. Allahın işidir. Qeyri-adi bir şey olmasa, xaricə yollanacağıq.