"Oyun gərgin və əsəbi getdi. Sürətin azlığı, tempin olmaması görünürdü. Məncə, biz ilk 15 dəqiqəyə yaxşı başladıq, 2 qol vəziyyətdən istifadə etsəydik, oyun tamamilə başqa formada gedəcəkdi. Sadəcə futbolçularımızın kobud səhvindən sonra qol buraxdıq və toparlana bilmədik, əsəbi futbol oynayırdıq. Futbolçularım bacardıqlarını da edə bilmirdilər. Elə futbolçumuz var ki, texniki cəhətdən idealdır, amma o sarıdan da problemi olurdu. Ad çəkmək istəmirəm. Komanda sanki bataqlığa batdı, amma çıxa bilmədi. Fasilədə də istədim ki, oyunçularımın psixoloji durumunu yaxşılaşdırım, onları sakitləşdirim. Ki, ayaqları işləyə bilsin. Bu da alınmadı. 2-ci yarıda oyunun tempi hər dəfə düşdükcə, dəqiqələr getdikcə, futbolçularda vahimə yaşanırdı, təşviş var idi. Bu da futbol oynamağımıza imkan vermədi. 1 xal bizim üçün vacibdir. Turnir cədvəli baxımından belədir. "Araz-Naxçıvan"a gələcəkdə uğurlar azrulayıram və oyuna görə onlar təşəkkür edirəm".

Prosport.Az xəbər verir ki, bunları "Səbail"in baş məşqçisi Şahin Diniyev Premyer Liqanın XV turunun "Araz-Naxçıvan"la oyunundan (1:1) sonra mətbuat konfransında iştirak edib. O, jurnalistlərin suallarını cavablandırıb:

– Nümayiş etdirdiyiniz oyuna görə 1 xala çox şükür edirsiniz?
– Məni tanıyırsınız da. Biz 1 xalı qazandıq.

– İlk dövrədə "Araz-Naxçıvan"a qalib gəlmişdiniz. Ancaq elə də yaxşı oynamamışdınız. Bu gün də, demək olar ki, yaxşı deyildiniz. Səbəb nədir?
– 15 oyunu analiz edəndə, bəlkə də pis oyunumuzun 3 dənə olduğu görünür. Bunlar "Qəbələ" ilə səfərdəki, "Araz-Naxçıvan"la evdəki və bu gün oynadığımız oyundur. Bilmirəm, yəqin ki, tempi, sürəti tuta bilməmişik. Dəqiq sizə cavab verə bilməyəcəyəm. Nə desəm, yalan olar. Amma sizinlə tam razıyam ki, layiqli, yaxşı futbol oynaya bilmədik.

– Aleksandr Ramalinqom haqda fikriniz necədir? "Zirə" ilə matçdan sonra ondan narazılıq etmişdiniz. Bu gün də o qədər aktiv deyildi... 
– Bilirsiniz, mən heç vaxt səbəb axtarmıram. Səbəb varsa, onun ən böyüyü özüməm. Futbolçularımız zədəlidir. Ağabala Ramazanov, Cabir Əmirli, Süleyman Əhmədov yoxdur, Yusif Nəbiyev zədəli-zədəli, David Qomis isə ağrıkəsici oyunlara çıxır. Kiçik komandada bu qədər itki böyük məsələdir. Tam formada deyilik. Formada olmamağımızın səbəbi zədəlilərin tam formaya düşməməsidir. Zaman azdır. Ramalinqoma gəlincə, çox keyfiyyətli forvarddır. Ancaq formada deyil. Yəqin ki, 1 həftədən sonra daha yaxşı Ramalinqom görəcəyik.