Azərbaycanın kişi voleybolu üzrə millisinin kapitanı və "Xarı Bülbül" (Şuşa) komandasının üzvü Tural Həsənli xəstəxanaya çatdırılıb.

Prosport.Az-ın məlumatına görə, o, Çelenc Kubokunun "Panatinaikos"la oyunundan sonra özünü pis hiss edib. Yunanıstanın paytaxtı Afinadan qayıdarkən onun səhhəti daha da pisləşərək çox kritik vəziyyət alıb.

Voleybolçu birbaşa aeroportdan özəl xəstəxanalardan birinə yerləşdirilərək ağır bir əməliyyat keçirib. Onun bağırsaq partlaması nəticəsində daxili qanaxma ilə üzləşdiyi bildirilir. Hazırda Turalın vəziyyəti nisbətən qənaətbəxş sayılır.

Qeyd edək ki, Tural Həsənli ötən mövsüm "Neftçi"nin heyətində çempionatın ən yaxşı oyunçusu seçilib.