"Şükürlər olsun ki, ilk dəfə qatıldığım hərbçilər arasında dünya çempionatının qalibi oldum və çoxsaylı medallarımın arasına bu qızıl medalı da qatdım. Mənim üçün çox dəyərli medaldır. Mənə azarkeşlik edən hər kəsə təşəkkür edirəm".

Bunu Prosport.Az saytına ikiqat olimpiya mükafatçısı, üçqat dünya və dördqat Avropa çempionu Hacı Əliyev bildirib.

32 yaşlı idmançı Bakıda 2012, 2014 və 2015-ci illərdə Qızıl Qran-prilərdə, eləcə də 2017-ci ildə IV İslam Həmrəyliyi Oyunlarında qızıl medal qazansa da, dünya çempionu olmamışdı. Sərhəd Qoşunlarının kapitanı olan Hacı 11 il əvvəl Bakıda keçirilmiş Dünya Kubokunda qaçırdığı qızıl medalı paytaxtımızda hərbçilər arasında təşkil olunan dünya çempionatındakı qızıl medalla sığortaladığını qeyd edib: 

"2012-ci ildə Bakıda keçirilmiş Dünya Kubokunda mən bütün görüşlərdə qalib gəlmişdim. Finalda iranlı güləşçini də məğlub etmişdim. Ancaq komanda yoldaşlarım məğlub olduğuna görə, mən də məcburiyyətdən gümüş medalla kifayətlənmişdim. Qismətdən hərbçilərin dünya çempionatının finalında da iranlı güləşçi ilə qarşılaşdım. Ona qalib gəlib ölkəmdə qızıl medal qazandım. Bütün qələbələrim mənim üçün önəmlidir. Çünki hər yarışın öz əziyyəti, zəhməti var. Fikirləşirəm ki, inşallah, bu şəkildə davam edib Parisdəki Yay Olimpiya Oyunlarında da qızıl medal qazanaraq bu gözəl arenalarla vidalaşaram".

Qeyd edək ki, dünən Bakıda start verilən hərbçilər arasında güləş üzrə dünya çempionatında Azərbaycan idmançıları 6 medal qazanıb. Sərbəst güləşdə Hacı Əliyevdən başqa, Əli Rəhimzadə (65 kq), Turan Bayramov (74 kq) və İbrahim Yusubov (92 kq) dünya çempionu olub, qadın güləşində Elnurə Məmmədova (50 kq) gümüş medalla kifayətlənib, Nərgiz Səmədova (55 kq) isə 3-cü olub.

Səbuhi Musa