Bakıda sabah start götürəcək hərbçilər arasında güləş üzrə dünya çempionatında Rusiya və Belarus idmançılarının himnləri səsləndiriləcək.

Bu barədə Prosport.Az saytının sualına Beynəlxalq Hərbi İdman Şurasının (CISM) Avropa üzrə vitse-prezidenti Dirk Şvede cavab verib.

Alman polkovnik bildirib ki, bu yarışda siyasət rol oynamayacaq: "Burada güləşən idmançılar siyasətdən uzaq insanlardır. Ona görə də Rusiya və Belarus idmançıları ilə bağlı xüsusi məhdudiyyət olmayacaq".

Əldə etdiyimiz məlumata görə, sabah start götürəcək yarışın Ümumdünya Güləş Birliyinin (UWW) təqvimindən çıxarılması da bu səbəbdəndir. Belə ki, Beynəlxalq Olimpiya Komitəsi Rusiya və Belarus idmançılarının yarışlara buraxılmasına icazə versə də, onların neytral statusda çıxış etməsini tövsiyə edir. Burada güləş döşəyinə çıxacaq 12 beynəlxalq dərəcəli hakimin üzərində də UWW loqosu olmayacaq.

Qeyd edək ki, 29 noyabr – 2 dekabr tarixlərində keçiriləcək dünya çempionatında sərbəst, qadın və yunan-Roma güləşi üzrə 18 ölkədən – Azərbaycan, Türkiyə, Rusiya, ABŞ, Qazaxıstan, Braziliya, Albaniya, İtaliya, İsveçrə, İran, Belarus, Rumıniya, Monqolustan, Nigeriya, Əlcəzair, Tunis, İordaniya və Tanzaniyadan 222 (176 kişi və 46 qadın) idmançı mübarizə aparacaq.

Səbuhi Musa