Daha bir futbol üzrə I Liqa komandasında istefa gerçəkləşib.

Prosport.Az-ın xəbərinə görə, ötən tur öz meydanında "Zaqatala"ya 0:1 uduzan "Mingəçevir" komandasının məşqçilər korpusu istefa verib.

Klubun İdarə Heyəti istefa xahişini qəbul edib və Samir Məmmədov baş məşqçi vəzifəsindən azad olunub. Yeni baş məşqçi Mingəçevir futbolunun əfsanələrindən sayılan, klubda məsləhətçi vəzifəsində olan Ədəhim Niftəliyev təyin olunub. Onun "Mingəçevir"in baş məşqçisi kimi ilk sınağı noyabrın 30-da Azərbaycan Kubokunun II təsnifat mərhələsində I Liqanın digər təmsilçisi "İmişli" olacaq. 

Qeyd edək ki, 47 yaşlı Ədəhim Niftəliyev futbolçu kimi "Kür", "Neftçi", MOİK, "Qarabağ", "Xəzər Lənkəran", "Masallı" və "Qala" klublarında çıxış edib, milli komandamızın müdafiəçisi kimi 19 oyuna çıxıb. O, "Neftçi"də və Mingəçevirin "Ulduz" komandasında aşağı yaş qrupları üzrə baş məşqçi vəzifəsində çalışıb.