Xəbər verdiyimiz kimi, Azərbaycan Şahmat Federasiyasında (AŞF) bu gün Hesabat Konfransı keçirilib.

İclasda Azərbaycan Şahmat Federasiyasının üzvlüyünə yeni şəxslər qəbul edilib. Konfransda AŞF-nın İcraiyyə Komitəsinin üzvlərinin sayının artırılması və yeni üzvlərin seçilməsi məsələlərinə baxılıb.

Ailə, Qadın, və Uşaq Problemləri üzrə Dövlət Komitəsinin sədr müavini, beynəlxalq qrossmeyster Aynur Sofiyeva, Elm və Təhsil Nazirliyinin Məktəbdənkənar fəaliyyətin təşkili şöbəsinin müdiri Elnur Əliyev səsvermə ilə İcraiyyə Komitəsinin yeni üzvləri kimi təsdiqlənib.

Həmçinin, AŞF-nın İntizam Komissiyası formalaşdırılıb. İlqar Xələfovla Ələmdar Məmmədov komissiyaya üzv, Elçin Məmmədov sədr seçilib. Bəs şahmat ictimaiyyətinə məlum olmayan şəxs – Elçin Məmmədov kimdir?

Məsələ ilə bağlı AŞF prezidenti, Beynəlxalq Şahmat Federasiyasının vitse-prezidenti Mahir Məmmədov Prosport.Az-a açıqlama verib: "Elçin Məmmədov İctimai Televiziyada efirə gedən "Çto, Qde, Koqda?" klubunun əməkdaşıdır. O, bu oyunun klub ənənələrinin qurucusudur. Həmçinin, o, Dövlət Vergi Xidmətinin rəisi Orxan Nəzərlinin müşaviridir".

Həmçinin, internet mənbələrinə əsaslansaq, Elçin Məmmədov Dövlət Vergi Xidmətinin Vergi ödəyicilərinə xidmət Baş İdarəsinin rəisi vəzifəsində də çalışır.

Qeyd edək ki, Naxçıvan Muxtar Respublikasının Ali Sovetinin sabiq sədri Vasif Talıbovun oğlu Seymur Talıbovun ötən il federasiyadan ayrıldığı deyilsə də, o bugünkü konfransda iştirak edib. S.Talıbov həm federasiyanın vitse-prezidenti, həm də İcraiyyə Komitəsinin üzvü kimi vəzifəsində qalır.

Xatırladaq ki, İcraiyyə Komitəsinin digər üzvləri I vitse-prezident Faiq Həsənov, Sərxan Həşimov və Cahangir Ağarəhimovdur.

Səbuhi Musa