"Sumqayıt" Azərbaycan Premyer Liqasının Xl turunda doğma meydanda "Qəbələ" ilə 0:0 hesablı heç-heçə edib.

Prsoport.Az xəbər verir ki, "kimyaçılar"ın baş məşqçisi Samir Abbasov matçdan sonra keçirilən mətbuat konfransında jurnalistlərin suallarını cavablandırıb:

– Yorğunluq hiss olunurdu. Bilirdik ki, bu əziyyəti çəkəcəyik. İlk dəqiqələrdə top itkiləri, verilən qərarlar sırf yorğun komandanın göstərəcəyi oyun idi. Anlayırdıq. 2-ci yarıda meydanda tam fərqli "Sumqayıt" gördük. Əldə etdiyimiz epizodları qola çevirə bilmədik. Lakin fasilədən sonra yaxşı oynadıq, qalib gəlmək istəyən komanda görünürdü. Demirəm ki, ilk yarıda da belə deyildi. Sadəcə, çox şey alınmırdı. Bu da yorğunluqla bağlı idi. "Sabah"la oyunda həddən artıq enerji vermişdik. Bu gün də oynadıq, uduzmadıq. Qarşıdakı matçlara köklənəcəyik. Yorğunluğu bu 1 həftədə atarıq və qələbə qazanarıq.

– Komanda 70-ci dəqiqədən sonra daha çox pressinq və hücumlar edirdi. Qol epizodlarınız da az deyildi, amma istifadə edə bilmədiniz. Bu nə ilə əlaqədardır?
– Son nöqtənin qoyulmaması sırf futbolçunun keyfiyyəti ilə bağlıdır. Keyfiyyətlərini ortaya qoya bilmədilər. Yorğunluq həqiqətən hiss edilirdi. "Qəbələ" açıq futbol oynayır. Bunu bilirdik. Qalib gəlmək emosiyası artmışdı. İstədik ki, qalib gələk.