"Kəpəz" Azərbaycan Premyer Liqasının Xl turunda səfərdə "Turan Tovuz"a 0:4 hesabı ilə məğlub olub.

Prosport.Az xəbər verir ki, Gəncə təmsilçisinin baş məşqçisi Azər Məmmədov matçdan sonra keçirilən mətbuat konfransında jurnalistlərin suallarını cavablandırıb:

– Danışılası çox şey yoxdur. Məğlub olmuşuq. Təhlil edib, səhvlərimizə baxmalıyıq. "Turan Tovuz" bu gün qələbəyə layiq idi.

– Əsas oyunçuların hamısını start heyətdə meydana buraxmışdınız. Buna baxmayaraq, ilk yarıda nəticə əldə edə bilmədiniz. Səbəb nədir?
– İlk hissə ümidverici futbol oynayırdıq. Oyunun qırılma nöqtəsi ilk hissənin son dəqiqəsində vurulan qol oldu. 2-ci hissədə vəziyyəti düzəltməyə çalışdıq. Hücuma atılanda qapımızda 2-ci qolu gördük. Bundan sonra komanda oyun intizamından qopdu.

– "Turan Tovuz" çox güclü oynadı, yoxsa "Kəpəz" zəif oynadı?
– Hesab edirəm ki, ilk hissə bərabər oyun gedirdi. "Turan Tovuz" fiziki baxımdan bizdən üstün idi. Buna görə qələbə qazandılar.

– "Turan Tovuz"la oyunda "Kəpəz" uğurlu nəticələr qazana bilmir. Bu sindromu qırmaq üçün nə lazımdır?
– Mən özüm futbol oynayanda da "Turan Tovuz"la oyunlar həmişə çətin olurdu. Etiraf edək ki, rəqib heyət, struktur olaraq bizdən üstündür. Səviyyə fərqi görünür. 

– Hakimlikdən narazılığınız var?
– İndiyə kimi hakimlər haqda danışmamışam. 0:4 hesabı ilə məğlub olmuşuqsa, hakim haqda danışmağa dəyməz. Amma məncə, 2-ci qoldan öncə verilən korner qərarı yanlış idi. Bundan sonra komanda tam olaraq açıldı. Orada korner yoxdursa, bunun məğlubiyyətə təsiri ola bilər.

– Mətbuat konfransına gec gəlməyinizin səbəbi nə idi?
– Qapı kilidlənmişdi, bir təhər aça bildik. Ona görə ləngidik.

– Növbəti turda "Qarabağ"la qarşılaşacaqsınız. Ağır məğlubiyyətdən sonra komandanı motivasiya etmək çətin olmayacaq?
– Sözsüz ki, favorit "Qarabağ"dır. Azərbaycanı Avropada uğurla təmsil edirlər. Amma biz güclü komandalara qarşı yaxşı oynayırıq. Bu gün ilk hissədəki oyunu oynasaq, "Qarabağ"ın avrokubok matçından yararlanıb nəticə əldə edə bilərik.