"Turan Tovuz" Azərbaycan Premyer Liqasının Xl turunda doğma meydanda "Kəpəz"i 4:0 hesabı ilə məğlub edib.

Prosport.Az xəbər verir ki, ev sahiblərinin baş məşqçisi Ayxan Abbasov matçdan sonra keçirilən mətbuat konfransında jurnalistlərin suallarını cavablandırıb:

– Çətin oyun oldu. Hər 2 komanda üçün vacib matç idi. Neçə oyundur ki, evdə qələbə qazana bilmirdik. Çox maraqlı və gərgin çempionat gedir. Bu qələbə bizə lazım idi. Hesab bizi aldatmasın. Açıq oyun getdi. Bundan sonra daha çətin olacaq. Sevindirici haldır ki, hesab bizə imkan verdi və akademiyanın yetirməsini oyuna buraxdıq. Gənc oyunçulara motivasiya olsun deyə belə addımlar atacağıq.

– Hiss edirdiniz ki, hesab böyük olacaq? Fasilədə komandaya nə tapşırdınız?
– İlk hissə gərgin başlamışdı. Rəqib bizi əks-hücumda yaxalayırdı. Amma oyun nəzarətimizdə idi. 2-ci hissədə futbolçulara oyundan qopmamağı tapşırmışdıq. Heyətdə çox dəyişikliklər olub. Oyundan-oyuna artırmaq istəyirik.

– Derbidə böyükhesablı qələbə qazanmaq necə hissdir?
– Qərb derbisi həmişə maraqlı olur. 1 komanda qalib gələr, digəri məğlub olar. Bu derbilər olmalıdır, futbolun gözəlliyidir. Futbolçular qol vurduqca onlara inam gəlir. 

– Ötən mövsüm Runi Eva və Natan Oduva komandanın qollarını vururdu. Bu mövsüm isə bir çox futbolçu fərqlənib. Taktikanı dəyişmisiniz?
– Taktikadan danışmayım, sirlərimi açaram (gülür). Ötən mövsümlə müqayisədə fərqlər var. Bu, oyunçuların keyfiyyətindən də irəli gələ bilər.  

– Fərid Nəbiyevin milliyə dəvət alacağını gözləyirsiniz?
– Bəli. Əsas heyətdə olmasa da, miliyə layiq futbolçudur.