"Səbail" Azərbaycan Premyer Liqasının Xl turunda səfərdə "Zirə" ilə 2:2 hesablı heç-heçə edib.

Prosport.Az xəbər verir ki, "dənizçilər"in baş məşqçisi Şahin Diniyev matçdan sonra keçirilən mətbuat konfransında jurnalistlərin suallarını cavablandırıb:

– Maraqlı oyun oldu. Azarkeşlər çox qol gördülər. 1-ci hissə bizim, 2-ci hissə "Zirə"nin üstünlüyü oldu. "Zirə" çox yaxşı təşkilatlanmış komandadır, müdafiədə boşluqlar vermir. İlk yarıda bu boşluqları tapa bildik. Daha bir neçə qol epizodumuz oldu, sadəcə bir az məsuliyyətli yanaşmadıq. 2-ci yarıda komanda psixoloji baxımdan "oturdu" və hesabı saxlamağa çalışdı. Futbol da belə şeyləri sevmir. Bəlkə də 11 oyunda mənim ən xoşuma gəlməyən bugünkü 2-ci 45 dəqiqə idi. Futbolçularımdan geridə qalmış 10 oyunda niyə xoşum gəlir? Rəqibin kimliyindən asılı olmayaraq, 3 xal üçün oynayırdıq. Futbolçuların gözləri yanır. Amma bu gün 2-ci yarıda onu görmədim. Komanda "oturdu" və buna görə mütləq cəzalandırılmalıydıq ki, o da oldu. "Zirə"yə uğurlar arzulayıram, Rəşad Sadıqov intizamlı komanda qurub. "Zirə" nə etmək istədiyini bilən komandadır. Bəlkə də səfərdə liderdən 1 xal almaq sevindirici hal ola bilərdi. Amma mən hər dəfə nəticədən çox, oyunun keyfiyyətinə fikir verən məşqçilərdənəm. O sarıdan 2-ci yarı məni çox məyus etdi. İrəli baxmalı, gələcək oyunlara hazırlaşmalıyıq.

– Aleksandr Ramalinqom fərdi oyuna üstünlük verirdi, əlverişli epizodda olan komanda yoldaşına ötürmə vermirdi...
– Razıyam. Paltardəyişmə otağında da ona dedim. Keyfiyyətli futbolçudur, bu gün sanki bir az özünü daha hazırlıqlı hesab edirdi. Çox bacarıqlı hücumçudur. Azərbaycan çempionatında görün nə qədər yaxşı müdafiəçilər var. Bir epizodda sadəlikdən mürəkkəbliyə keçdi. Məncə, gələn oyunlarda belə səhvlər olmayacaq. "Zirə" geridə qalan 11 oyunda heç vaxt 2 qol buraxmamışdı. Belə komandaya 2 qol vurmaq... 2-ci yarı rəqib bizdən daha yaxşı oynadı. Məncə, nəticə oyuna görə oldu.

– Qışa qədər "Səbail" çempionatı 2-3-cü bitirsə, yeni transferlər olacaq?
– Şans olacaqsa, hərəkət edəcəyik.

– Pedru Nununu niyə əvəzlədiniz?
– Pedru topla oynamağı sevən, yaradıcı biridir. 2-ci hissədə yaradıcılıqda 0-a düşdük. Bizdə top yox idi. O qaçmağa başladı və yoruldu. Dəyişdik ki, ortanı bağlayaq. Əfsus ki, topsuz işlədiyi üçün yoruldu.

– Digər klubların məşqçiləri gəncdir. Rəqabət hiss edirsiniz? Vaxtı ilə rəhbərliyiniz altında oynayıblar...
– Hər birini çox istəyirəm. Böyük hörmətim var, öz işlərini mükəmməl görürlər. Azərbaycan çempionatında tarazlıq yaranmasında onların rolu böyükdür. Komandalarımız taktiki cəhətdən savadlı oynayır. Məşqçi, oyun və maliyyə bir-birilə bağlıdır.

– Sizdə əminlik var ki, "Səbail"in sponsoru sona qədər öhdəliklərini yerinə yetirəcək?
– Bu ilin mayında "Şamaxı" ilə matçımız var idi. Klubun taleyi nazik ipdən asılı idi, yəni son oyundan. Bu klub yox ola bilərdi. Heç kim sənə zəmanət verə bilməz ki, zaman xeyrinə işləyəcək. Yanvarda biləcəksən ki, sən nəyə qadirsən. Əvvəldən 2 Ramalinqom gətirib, ilk turda "Sumqayıt"a 1:4 uduzsaydım, heç kim məni başa düşməyəcəkdi. Baxışım budur, bəlkə səhvdir. Mələk deyiləm, günahlarım da var. Amma istəyirəm axşam yatanda rahat olum, bilim ki, heç kimin haqqına girməmişəm. Büdcə var, o demək deyil ki, nə istəyirsən, et. Mən "Səbail"də, futbolumuzda özümdən sonra iz buraxmaq istəyirəm.

– Ötən il demişdiniz ki, "Səbail" Premyer Liqada qalacaq və qaldı. Bu mövsüm istək nədir?
– İstəklə reallıq üst-üstə düşməlidir. Hərdən düşmür. Deyirlər ki, 3-də gedirsən, niyə 2-ni istəmirsən? Axı reallıqlar var. Demişdim ki, iddialı "Səbail" olacaq, oldu. Hər oyunda qol vururuq, futbol oynayırıq. Bu gün niyə narazı idim? Dedim arxada oturmayın, qorxaq oynamayın, 0:5, 0:8 uduzun, mən qəbul edəcəyəm. Qəbələdə pis oynadıq, amma istək var idi. Qol vurduq. Bu gün istədiyimi görmədim, sanki 3 xala oynamadıq. Qorxmayaq, futbol oynayaq, camaat gəlir futbola baxmağa. Sən 1 saat yerdə uzan qal, o biri hara gəldi vuracaq. Kimə ləzzət verəcək? İstəyim yaxşı futboldur.