Azərbaycan kikboksçusu Amin Quliyev Səudiyyə Ərəbistanının paytaxtı Ər-Riyadda keçirilən III Ümumdünya Kombat Oyunlarında ölkəmizə daha bir qızıl medalı qazandırıb.

Prosport.Az-ın məlumatına görə, o, finalda ötən il Türkiyənin Konya şəhərində keçirilmiş V İslam Həmrəylik Oyunlarının qalibi Ali Atabərk Gürbüzcanla qarşılaşıb. "Lou kik" 60 kq çəki dərəcəsində keçirilən döyüşdə gənc idmançımız rəqibinə qalib gələrək multiidman yarışının qızıl medalını qazanıb.

Qeyd edək ki, Eduard Məmmədovun tələbəsi olan və öz ləqəbini verdiyi "Ağ canavar" Amin Quliyev 1/4 finalda Andres Unsue Kazaxusu (İspaniya) və 1/2 finalda Maksim Semençuku məğlub etmişdi.

Xatırladaq ki, bu, multiidman yarışında Azərbaycan Kikboksinq Federasiyası idmançılarının bu il qazandığı 2-ci böyük uğurdur. Bu il Polşanın Mışlenitse şəhərində Eduard Məmmədovun digər tələbəsi Fərid Ağamoğlanov III Avropa Oyunlarının qızıl medalını qazanmışdı.

Əlavə edək ki, oktyabrın 30-dək davam edəcək III Ümumdünya Kombat Oyunlarında Azərbaycan idmançıları daha əvvəl 6 medal qazanmışdı. Bunlardan 1-i qızıl, 1-i gümüş və 4-ü bürünc medal olmuşdu. Belə ki, Əli Quliyev (66 kq, pankration) qızıl, Hüseyn Məmmədli (67 kq, karate) gümüş, Nadir İmaməliyev (84 kq, qraplinq), Orxan Hətəmov (56 kq, uşu), Esmira Məmmədova (65 kq, pankration) və Ramir Ağalarov (92 kq, pankration) bürünc medala yiyələnmişdilər.