"Neftçi" klubunun aşağı yaş qruplarından ibarət komandaları İsveçdə təcrübə keçə bilərlər.

Prosport.Az xəbər verir ki, bu barədə "ağ-qaralar"ın idman direktoru Yens Andersson mətbuat konfransında bildirib.

İsveçdən olan mütəxəssis konkret planlar olmasa da, məsələnin müzakirəyə açıq olduğunu vurğulayıb: "Niyə də yox?! Çox gözəl fikirdir. Azərbaycanlı futbolçunun (Musa Qurbanlını nəzərdə tutur – red.) İsveçdə oynadığını bilirəm. Düzdür, Azərbaycan futbolu ilə bağlı təcrübəm hələlik çox deyil. AÇ-2024-ün seçmə mərhələsində milli komandanıza qarşı oyun keçirmişik. Noyabrda da İsveç yığması buraya gələcək".

O, ölkəsindən "Neftçi"yə futbolçu transfer olunması ehtimalına da toxunub: "Ola bilər. Amma mütləq şəkildə isveçli olması şərt deyil. Yaxşı futbolçu fərqli mədəniyyətə uyğunlaşa biləcəkmi? Ümumiyyətlə, gələn legionerin Azərbaycanda nə dərəcədə özünü göstərə biləcəyinə baxmaq lazımdır".