"Sumqayıt" Azərbaycan Premyer Liqasının ll turunda doğma meydanda "Sabah"ı 1:0 hesabı ilə məğlub edib.
Prosport.Az xəbər verir ki, "kimyaçılar"ın baş məşqçisi Samir Abasov matçdan sonra keçirilən mətbuat konfransında jurnalistlərin suallarını cavablandırıb:
– Qələbəni azarkeşlərə həsr edirəm. Ötən oyunda da ilk hissədə yaxşı oynamışdıq. Bunun üzərində dayanmışdım. Matçdan sonra futbolçular qızışmış vəziyyətdə idilər. Fikirləşirdim ki, 1-2 saat sonra yenə oynasaq, tam fərqli olardı. Uşaqlar çox məyus olmuşdular. Futbolçular özləri həftə ərzində hazırlaşdılar. Bizim bir əməyimiz yoxdur. Artıq bu ildən komanda olaraq bəzi şeyləri qırmağa başlamışıq. Ötən il qollar vurmurduq, bu il vururuq. Artıq 14 xalımız var. Çempionluğa oynayan komandalarla matçlarda əziyyət çəkirdik. Gələn-gedən 4-5 dənə vururdu. İnanıram ki, yaxşı komanda olacağıq. Yığdığımız xallar qənaətbəxşdir. Çempionatda möhkəm komandaya çevrilə bilərik.
– Ötən oyunda da eyni senari idi. Lakin bu dəfə üstünlüyünüzü qoruyub qələbə qazandınız. Fasilədə uşaqlara nə dediniz?
– Ötən oyunu xatırladıq. Bu gün hesab daha fərqli ola bilərdi. Qələbə üçün şadıq. Bu oyun bizim üçün dərs olmalıdır. Qoldan sonra arxaya çəkilirik. Bunu aradan qaldıra bilsək, yaxşı olacaq.
– Qapıçı mövqeyində dəyişiklik nə ilə bağlı idi?
– Rəqibin oyununa görə oldu. Mehdi Cənnətov standard vəziyyətlərdə daha yaxşıdır.
– Kazimir Ninqanın oyunu sizi qane etdi?
– Düşünürəm ki, hücumun mərkəzində daha faydalı idi. Bəzi məqamlarda yoruldu. Çıxışı məni qane etdi.
– İlk dövrəyə baxanda komandanızın müdafiə planından razı qaldınız?
– Müdafiə planı tək 4 oyunçudan asılı deyil. Bu söhbətləri xırdalasam, çox çəkəcək. Müdafiəni də komanda şəklində qurmaq lazımdır. 5 qol buraxmışıq və narazı olduğumu deyə bilmərəm. Fərdi səhvlər texnika ilə bağlıdır. Əsas olan komanda şəklində düzgün müdafiə olunmaqdır. Bir az vaxt lazımdır. Tək müdafiəçilərin üzərinə düşmək olmaz.
– Karyeranızda ən coşğulu dəstəyi "Sumqayıt" azarkeşlərindən görmüsünüz. "Neftçi"də fanatlarla aranız elə də yaxşı deyildi...
– "Sumqayıt", "Neftçi" azarkeşlərindən böyük dəstək görmüşəm. Fanatların içində bəziləri ola bilər ki, məni sevməsin. Amma o demək deyil ki, "Neftçi" azarkeşlərini bəyənməmişəm. Sumqayıtda yaşayıram, bura mənə doğmadır. Bu komandada işləmək rahatdır.
– "Neftçi"ni çempion etmişdiniz. Yenidən iddialı komandadan olmaq istəməzsiniz?
– Olmaz burada iddialı olaq? Əvvəli xatırlayın, bu tribunalarda azarkeş olmurdu, yavaş-yavaş artdılar. "Sumqayıt"la 2-ci yerə qədər də qalxmışdıq.
– "Neftçi"nin oyununu necə dəyərləndirirsiniz?
– Yenidən söhbət "Neftçi"yə gəldi. Möhtəşəm futbolçuları var. Hətta "Qarabağ"dan daha yaxşı ola biləcək gücdədirlər.