"Sabah" Azərbaycan Premyer Liqasının ll turunda səfərdə "Sumqayıt"a 0:1 hesabı ilə məğlub olub.

Prosport.Az xəbər verir ki, Masazır təmsilçisinin baş məşqçisi Murad Musayev matçdan sonra keçirilən mətbuat konfransında jurnalistlərin suallarını cavablandırıb:

– İlk hissədə rəqib bizdən daha yaxşı oynadı. Layiq olduqları qolu vurdular. 2-ci hissəyə görə futbolçulara heç bir iradım yoxdur. 46-cı dəqiqədən sonra oynamağa başladıq. Məğlubiyyətdə özümüz günahkarıq.

– 3-4 gün əvvəl də "Sumqayıt"la oyunda ilk hissədə məğlub duruma düşmüşdünüz. Amma geridönüş etmişdiniz. Bu gün nə alınmadı?
– Əlimizə düşən qol imkanlarından yararlana bilmədik. Rəqib rahat oynayırdı. Biz hesabı bərabərləşdirsəydik, onlar daha çox boşluqlar verəcəkdi. Ötən oyunda hesab 1:1 olandan sonra rəqib hücuma gedirdi. Onda boş zonalar tapa bilirdik.

– Kahim Parris və Cesse Sekidikaya çox şans verirsiniz. Onların performansını necə dəyərləndirirsiniz?
– Heç kimi müsbət dəyərləndirə bilmərəm. Çünki məğlub olmuşuq. İmkanlarımızdan aşağı çıxış etdik.

– Bu məğlubiyyət psixoloji təzyiq yaratmayacaq?
– Peşəm elədir ki, təzyiq hər gün var.

– Yenə qırmızı vərəqə aldınız. Hakimlərin sizinlə problemi nədir?
– Məncə, məndən daha çox, onların özləri ilə bağlıdır. Emosiya göstərdiyim üçün qırmızı vərəqə göstərirlər.