“Qarabağ” qış transfer dönəmində aparıcı futbolçusu Abdullah Zubiri itirə bilər. “L’Equipe” nəşrinin iddiasına görə, fransalı yarımmüdafiəçi ölkəsinə qayıtmağa yaxındır.

Prosport.Az xəbər verir ki, 31 yaşlı sol cinah oyunçusunun hətta Liqa 1-də çıxış etmək ehtimalı yüksəkdir. Adları açıqlanmasa da, Fransa yüksək liqasında turnir cədvəlinin ortabab komandalarının onunla maraqlandığı yazılıb.

Eyni zamanda Səudiyyə Ərəbistanından bir klub da Zubiri heyətinə qatmağı düşünür. Lakin “Lans”ın sabiq oyunçusu Liqa 1-də oynamağa daha meyllidir.

İndiki məqamda əsas maneə futbolçunun “Qarabağ”la müqaviləsinin davam etməsidir. Zubiri heyətinə qatmaq istəyən klub Ağdam təmsilçisinin təzminat tələbini qarşılamalı olacaq.

Qeyd edək ki, Abdullah Zubir 2018-ci ildən “Qarabağ”ın formasını geyinir. 31 yaşlı oyunçunun hazırkı anlaşması mövsümün sonunda bitəcək.