"Mətbuatda "İrəvan"a qayıtmağım ilə bağlı yayılan məlumat doğru deyil. Ancaq "İrəvan"dan – "Xəzər Lənkəran"da sabiq baş məşqçim olmuş Nazim Süleymanovdan təklif gəlmişdi. Sadəcə, bunu qəbul etmədim".

Bunu Prosport.Az-a açıqlamasında "İrəvan"dan 45 yaşında oynamaq təklifi almış Alim Qurbanov deyib.

O, futbolçuları maaş almadıqları üçün məşqlərə çıxmayan I Liqa klubu "İrəvan"dan təklif aldığını təsdiqləyib. O bu təklifi qəbul etməməsinin səbəbini belə açıqlayıb:

"Çünki "Araz-Naxçıvan"ın əvəzedici komandasında Zaur İsmayılovun köməkçisi işləyirəm. Hazırda yaş da oynamaq üçün doğru deyil. Dekabrın 5-də 46 yaşım tamam olacaq. "Araz-Naxçıvan"da işləyə-işləyə başqa klubda oynamağım alınmaz. Onun üçün gərək "Araz-Naxçıvan"dan ayrılmalı idim".