Türkiyənin “Hatayspor” klubunda çıxış edən Azərbaycan millisinin futbolçusu Renat Dadaşov Super Liqanın lX turunda “Fənərbağça”ya 2:4 hesabı ilə uduzduqları səfər matçı ilə bağlı fikirlərini bölüşüb.

Prosport.Az xəbər verir ki, 24 yaşlı hücumçu bu barədə şəxsi “instaqram” hesabında paylaşım edib: “Güclü rəqib qarşısında istədiyimiz nəticəni qazana bilmədik. Cümə günü keçiriləcək növbəti matça köklənəcəyik”.

Qeyd edək ki, sözügedən oyuna start heyətində başlayan Renat Dadaşov sonadək meydanda olub. Onun 2-ci hissədə qol vurmaq üçün vəziyyəti olsa da, xorvat qapıçı Dominik Livakoviç onun zərbəsini dəf edib. Həmçinin, "Hatayspor"un ilk qolu zamanı məhz ona qarşı edilən kobudluqdan sonra "Fənərbağça" qapısı tərəfə cərimə zərbəsi təyin edilib.

“Hatayspor” oktyabrın 27-də “Kayserispor”u qəbul edəcək.