Avstriya yığma komandası AÇ-2024-ün seçmə mərhələsi çərçivəsində Bakıda Azərbaycan yığmasını 1:0 hesabı ilə məğlub edib.
Prosport.Az xəbər verir ki, qonaqların baş məşqçisi Ralf Ranqnik matçdan sonra keçirilən mətbuat konfransında jurnalistlərin suallarını cavablandırıb:
– Asan oyun olmadı. Bura hazır gəlmişdik. Azərbaycanın hansı oyuna qadir olduğunu bilirdik, son 2 matçlarına baxmışdıq. Bura gələndə Azərbaycanı analiz etmişdik. Asan olmasa da, konsentrasiya olmuşduq ki, qalib gələk. Buna da nail olduq.
– Son dəqiqələrdə futbolçularınız Şahruddin Məhəmmədəliyevin üzərinə şığıdı. Qorxmurdular ki, cavabı başqa cür olar?
– Əgər davanı nəzərə alırsınızsa, bu, futboldur, hər vəziyyət ola bilər. Dava da həmçinin. Sona 10 dəqiqə qalmış Saşa Kalayciç sifətinə zərbə almışdı. Bilərəkdən nəsə etmədi.
– Qələbə qazandıqca, oyunçular rahatlıq hiss edir?
– Oyunçular mahnı oxuyurdular. Qalib gəlməklə arxayınlaşmırıq. Öz üzərimizdə işləməliyik.
– Meydanda hansısa söyüş oldu?
– Meydanda hər şey ola bilər. Futbolçular bir-birini söyə də, itələyə də bilər. Fransa, İspaniya, Belçika ilə görüşlərdə də hətta bir-birini söyürdülər. İrəli addım atmaq üçün hər üsuldan istifadə etməliyik. Təsnifat mərhələləri çətin olduğu üçün oyunçular özlərindən çıxır.
– Azərbaycan çempionu "Qarabağ" Almaniyanın "Bayer" klubu ilə Avropa Liqasında ardıcıl 2 oyun keçirəcək. Bir alman mütəxəssisi kimi deyə bilərsinizmi, "Qarabağ" onlardan xal ala bilər?
– Hazırda başqa oyundayıq. "Qarabağ"la maraqlanırıq, məlumatımız var. "Bayer" indi yaxşı formadadı, Bundesliqada yaxşı nəticələr əldə edirlər. Xal alacaqlar ya yox, bunu vaxt göstərəcək. Yığma ilə bağlı sual varsa, verə bilərsiniz. Avstriyada da Azərbaycan klubları izlənilir, "Qarabağ" da tanınır.
– Azərbaycan millisi ilə görüşdə səhvlər olurdu, oyunçularınız toparlana bilmirdi. Fasilədə onlara nəsə dediniz?
– İlk hissədə çalışdıq ki, erkən qol vuraq, amma alınmadı. Azərbaycan yaxşı müdafiə olunurdu. Səhvlər edirdik, toparlana bilmirdik. 2-ci hissə başlayanda oyunçulara dedim ki, toparlanmaq və ən azı 1 qol vurmaq lazımdır. Başlayan kimi qol vurduq. Amma rahatlaşmalı deyilik. 2-ci yarıda yenə səhvlər edirdik (bundan sonra Avstriya millisinin futbolçuları əllərində şampan mətbuat konfransına daxil olur və baş məşqçinin üzərinə onu tökür. Konfrans isə yarımçıq dayandırılır – red.).