Azərbaycanlı peşəkar boksçu, "Ağ canavar" ləqəbli Murad Əliyev titulunu qoruyub.

Prosport.Az-ın xəbərinə görə, o, Almaniyanın İlzenburq şəhərində keçirilən döyüş gecəsində bu ölkənin sakini, milliyyətcə yunan olan Evgenios Lazaridislə qarşılaşıb.

Bunadək 18 qələbəsi və 4 məğlubiyyəti olan təcrübəli Lazaridis 2-ci raundda nokdauna düşüb. 10 raund davam edən döyüşdə hakimlər qələbəni Murada verib. Bununla da Əliyev peşəkar boksda məğlubedilməzliyini qorumaqla yanaşı, fevralın 4-də qazandığı WBC Beynəlxalq Gümüş ağırçəki kəmərini qoruyub. Bu, 2 il əvvəl peşəkar boks karyerasına start vermiş Muradın 8-ci qələbəsi olub.

Qeyd edək ki, Murad Əliyev azərbaycanlı olsa da, Fransa vətəndaşlığı var. O, Fransa adından həvəskar boksda Minskdə II Avropa Oyunlarının finalçısı, Tokio Olimpiadasının iştirakçısı olub. Onun meneceri isə Almaniya sakini Anar Axundzadədir.