"Qarabağ"ın 15 yaşadək komandası U-15 Liqasının V turunda daha bir qələbə qazanaraq liderlik mövqeyini daha da möhkəmləndirib.

Prosport.Az-ın xəbərinə görə, Rakif Əliyevin yetirmələri bu dəfə "ASCO Arena"da baş məşqçisi Hüseyn Axundov, məşqçisi Elvin Məmmədov olan "Səbail"in qonağı olub.

Bu turadək ən çox qol (20) vuran 2 komandanın mübarizəsində qonaq komanda olan "Qarabağ" qələbə qazanıb. Ağdam təmsilçisi rəqibini 4:0 hesabı ilə darmadağın edib.

Qolları Hüseyn Bayramov (11-ci dəqiqə), Riad Qaradağlı (40-cı dəqiqə) və Polad Hüseynov (43-cü dəqiqə) vurub. "Səbail"in futbolçusu Əliməmməd Süleymanov isə 49-cu dəqiqədə avtoqola "imza atıb". Hüseyn Bayramov qolunu Azərbaycanın Qarabağ bölgəsində lokal xarakterli antiterror tədbirləri zamanı şəhid olmuş polkovnik-leytenantı Vüsal Rüstəmova həsr etdiyini göstərən şəklini nümayiş etdirib.

Beləliklə, itkisiz irəliləyən "Qarabağ" xallarını 12-yə yüksəldib. Komanda keçirdiyi bütün görüşlərdə qələbə qazanıb.