"Nuqzari Surtsumia ilə 11-ci dəfə qarşılaşırdım". 

Bunu Prosport.Az-a açıqlamasında yunan-Roma güləşi üzrə üçqat dünya və ikiqat Avropa çempionu olan Eldəniz Əzizli deyib.

Serbiyanın paytaxtı Belqradda keçirilmiş güləş üzrə dünya çempionatında Eldəniz Əzizli 1/8 finalda Taiqa Onişiyə (Yaponiya) 3:1, 1/4 finalda Marlan Mukaşevə (Qazaxıstan) 6:0, 1/2 finalda Puya Dadmarza (İran) 3:2 qalib gəldi. Onun finaldakı rəqibi isə köhnə tanış Nuqzari Surtsumia (Gürcüstan) idi. Hesabı 50 saniyəyə 13:4 fərqli üstünlüyə gətirib çıxaran Eldəniz vaxtından erkən 3-cü dünya çempionluğunu təmin etdi.

31 yaşlı idmançı finalda qələbə qazanacağından əmin olduğunu bildirib. Bunun səbəbi var: "İndiyədək bütün görüşlərdə ona qalib gəlmişəm. 9 dəfə təmiz qələbə ilə, 2 dəfə isə xal hesabı ilə onu məğlub etmişəm. Dünya çempionu olduğum turnirlərdə 2018-ci ildə yarımfinalda 6:3, ötən il finalda 8:0, bu il də finalda 13:4 qalib gəldim. 2018-ci ildə çempion olduğum Avropa çempionatının 1/4 finalında 9:0, ötənilki Avropa çempionatının finalında isə 8:2 hesabı ilə onu yenmişəm. Ona görə də öz çəkimdə ən yaxşı tanıdığım idmançılardan biridir".

Ötən il Belqradda keçirilən dünya çempionatının qalibi olan Eldəniz yenə eyni məkanda titulunu qoruyaraq yunan-Roma güləşində üçqat dünya çempionu olan yeganə idmançımız ünvanına sahib çıxdı. Bəs Serbiya onun üçün nəyi ifadə edir?: "Belqrad və Macarıstanın paytaxtı Budapeşt şəhəri mənə doğmadır. Serbiyada (Zrenyanin şəhəri) 2008-ci ildə yeniyetmələrin, 2011-ci ildə isə gənclərin Avropa çempionu olmuşam. Budapeştdə isə 2010-cu ildə gənclər arasında, 2018-ci ildə böyüklər arasında dünya, 2022-ci ildə böyüklər arasında Avropa çempionu adına yiyələnmişəm".  

Bəs Eldəniz Əzizli gələn il Bakıda keçiriləcək Avropa Olimpiya Təsnifat turnirinə qatılmağı düşünürmü? Bunun üçün o, 55 kq çəki dərəcəsindən olimpiya çəki dərəcəsi hesab edilən 60 kq-a keçid etməlidir: "60 kq çəki dərəcəsinə keçməyim məşqçilər korpusu ilə birgə verəcəyimiz qərardan asılı olacaq. Çəkimi qaldırıb Bakıdakı lisenziya turnirində çıxış edəcəyimi dəqiq bilmirəm. Amma hər bir idmançı kimi mənim də arzum Olimpiya Oyunlarında iştirak etməkdir".

Qeyd edək ki, Azərbaycanı 60 kq çəki dərəcəsində Nihat Məmmədli son dünya çempionatında təmsil edib. O isə 1/4 finalda 2020-ci ilin Avropa çempionu Qevorq Qəribyana (Ermənistan) 1:3 uduzduğundan, lisenziya qazana bilməyib.