"Qarabağ"ın 15 yaşadək komandası Azərbaycan çempionatında maksimum nəticə göstərib.

Prosport.Az-ın xəbərinə görə, komanda son turda "Araz Saatlı"dan olan rəqib kollektivi darmadağın edib – 12:0.

"Sərhədçi" İdman Mərkəzində keçirilən matçda qolları Adəm Qafarov (2, 33), Xəzər Nağızadə (7, 18), Əhəd Hacızadə (31), Kənan Şahbazov (48, 50), Əli Bəşirov (70-pen., 77), Hüseyn Bayramov (71, 78) və Polad Hüseynov (72) vurub.

Onu da qeyd edək ki, bu matçda "Qarabağ" U-15-nin daha az oynamaq şansı əldə edən futbolçularına şans verilib. Həmin futbolçular isə rəqib qapısından 7 top keçirib. 66-cı dəqiqədən etibarən əsas "11-liy"in üzvlərindən Əli Bəşirov, Polad Hüseynov və Hüseyn Bayramovun meydana buraxılmasından sonra fərq daha da artıb. Bu 3 futbolçu 8 dəqiqəyə 5 qol vurub.

Qeyd edək ki, "Qarabağ" daha əvvəl "Qəbələ"ni 4:0 və "Kəpəz"i 4:2 məğlub etmişdi. Rakif Əliyevin yetirmələri hazırda 9 xalla U-15 Liqasının turnir cədvəlinə başçılıq edir.