Serbiyanın paytaxtı Belqradda keçirilən dünya çempionatının yunan-Roma yarışlarının qalibi Azərbaycan olub.
Prosport.Az xəbər verir ki, son gündə 2 final uduzsa da, millimiz tarixi nəticəyə imza atıb.
Belə ki, son gündə Murad Məmmədov (63 kq) finalda Gürcüstan təmsilçisi Leri Abuladzeyə sonuncu xal prinsipi ilə uduzub – 2:2. Bununla da Abuladze ilk dəfə dünya çempionu olub.
Olimpiadaya lisenziyanı təmin etmiş Həsrət Cəfərov (67 kq) isə kubalı olimpiya çempionu Luis Ortaya finalda 3:4 uduzub. Luis Orta ilk dəfə dünya çempionluğu sevinci yaşayıb.
İslam Abbasov (87 kq) təsəlliverici yarışlarda qırğız Azad Saliddinova 5:1 və belaruslu Kiril Maskeviçə 6:1 qalib gəlsə də, bürünc medal görüşündə Bolqarıstanı təmsil edən ukraynalı Semyon Novikova 3:6 hesabı ilə uduzub. O, Olimpiadaya lisenziya uğrunda həlledici görüşdə isə 2014-cü ilin Asiya çempionu Nursultan Dursunova (Qazaxıstan) 0:8 uduzaraq şansını əldən verib.
Beləliklə, 2 qızıl və 3 gümüş medal qazanan yığma 120 xal toplayaraq ilk dəfə komanda hesabında dünya çempionu olub.
Daha öncə sərbəst güləşdə belə bir uğurumuz olmayıb. Buna qədər ən yaxşı nəticələr sərbəst güləşdə 2009 və 2010, yunan-Roma güləşində isə 2015 və 2022-ci ildə qeydə alınıb. Həmin dünya çempionatlarında millilərimiz komanda hesabında 2-ci yeri tutub.
Yunan-Roma güləşi üzrə millimiz həm medalların əyarına, həm də toplanan xallara görə də dünya çempionatlarında Azərbaycan güləş yığmaları tarixinin ən yaxşı nəticəsinə imza atıb.
Mundialda İran (102) 2-ci, Türkiyə (93) isə 3-cü yeri tutub.
Xatırladaq ki, bu yarışda Eldəniz Əzizli (55 kq) ilə Rafiq Hüseynov (82 kq) dünya çempionu olub. Murad Məmmədov (63 kq), Həsrət Cəfərov (67 kq) və Sənan Süleymanov (77 kq) isə gümüş medal qazanıb. Komandamız 67 və 77 kq-da olimpiadaya lisenziya əldə edib.
Ümumilikdə isə bu dünya çempionatında daha 2 gümüş medal sərbəst güləş millimizin payına düşür. 2 qızıl və 5 gümüş medalla Azərbaycan 4-cü olub. Medal əyarına görə 1-ci yeri Yaponiya (6-3-3), 2-ci yeri ABŞ (4-3-7) və 3-cü yeri Qırğızıstan (3-1-1) tutub.
