Serbiyanın paytaxtı Belqradda keçirilən güləş üzrə dünya çempionatında daha 2 güləşçimiz finala çıxıb.
Prosport.Az xəbər verir ki, yarışın 8-ci günündə yunan-Roma güləşi üzrə son 3 çəkidə mübarizəyə start verilib.
Mübarizəyə 1/8 finaldan qoşulan dünya və ikiqat Avropa mükafatçısı Murad Məmmədov (63 kq) amerikalı Ksavyer Consona və ermənistanlı Hraçya Poqosyana 3:1 hesabıyla qalib gələrək yarımfinala vəsiqə qazanıb. Finalın bir addımlığında osetin əsilli Serbiya təmsilçisi Georgi Tibilovla qarşılaşan Məmmədov 4:1 hesablı qələbəyə sevinib. Murad həlledici görüşdə gürcüstanlı, ikiqat dünya mükafatçısı və ikiqat Avropa çempionu Leri Abuladzeylə qarşılaşacaq.
Dünya mükafatçısı və Avropa çempionu Həsrət Cəfərov (67 kq) əvvəlcə meksikalı Edson Olmosa heç bir şans tanımayıb – 8:0. İstedadlı pəhləvanımız 1/8 finalda macarıstanlı İştvan Vançanın öhdəsindən gəlib – 5:1. Cəfərov 1/4 finalda iranlı olimpiya və dünya çempionu Məhəmməd Rza Gərayi ilə qarşılaşıb. Titullu rəqibinə tam üstünlüklə (10:0) qalib gələn Həsrət 2 il əvvəlki məğlubiyyətin revanşını alıb. Milli üzvü yarımfinalda isə gücünü ermənistanlı Slavik Qalstyana göstərib – 5:3. Beləliklə, karyerasında ilk dəfə dünya çempionatının finalına yüksələn 20 yaşlı Cəfərov həm də ölkəmizə güləşdə 3-cü olimpiya lisenziyasını qazandırıb. Həsrət finalda Tokio Olimpiadasında 60 kq-da qızıl medal qazanmış kubalı Luis Orta ilə güləşəcək.
Üçqat Avropa mükafatçısı İslam Abbasov (87 kq) moldovalı Viorel Burdujaya 5:1 hesabıyla qalib gələrək 1/16 finala yüksəlib. Güləşçimiz əlcəzairli Bəşir Sid Azaranı isə sonuncu xal prinsipinə əsasən (1:1) üstələyib. Ancaq 1/8 finalda macarıstanlı David Loşonçi ilə bacarmayıb – 0:8. Rəqib finala yüksəldiyi üçün Abbasov sabah həm olimpiya lisenziyası, həm də bürünc medal üçün təsəlliverici görüşlərə qatılacaq. Onun bu yolda ilk rəqibi qırğızıstanlı Azad Saliddinov olacaq. İdmançımız mərhələ keçəcəyi halda müvafiq olaraq belaruslu Kiril Maskeviç və Bolqarıstanı təmsil edən ukraynalı Semyon Novikovla qarşılaşacaq.
Qeyd edək ki, bu çəkilərdə təsəlliverici və medallar uğrunda görüşlər sabah keçiriləcək.
