Azərbaycanın daha 2 yunan-Roma güləşçisi Serbiyanın paytaxtı Belqradda keçirilən dünya çempionatında finala yüksəlib.

Prosport.Az-ın xəbərinə görə, 82 kq çəki dərəcəsində olimpiya mükafatçımız, dünya və üçqat Avropa çempionumuz Rafiq Hüseynov əzəli rəqibi Burhan Akbudakla (Türkiyə) yarımfinal görüşünə çıxıb. Türk dünya və Avropa çempionu öndə olsa da, 2-ci hissədə əzmkarlıq nümayiş etdirən Rafiq hesabı 5:5 edərək qalib olub. Onun finaldakı rəqibi Əlirza Mohmadi (İran) olacaq.

Dünya mükafatçısı və Avropa çempionumuz Sənan Süleymanov da finala çıxan 3-cü yunan-Roma güləşçimiz olub. O, dünya və ikiqat Avropa çempionu Malxas Amoyana (Ermənistan) heç bir şans verməyib – 5:0. Sənanın finaldakı rəqibi olimpiya mükafatçısı, dünya və üçqat Asiya çempionu Akjol Mahmudov (Qırğızıstan) olacaq.

Bununla da Sənan Süleymanov sərbəst güləşçi Məhəmmədxan Məhəmmədovdan sonra Paris Olimpiadasına vəsiqə qazanan 2-ci güləşçimiz olub.

18:58

Azərbaycanın yunan-Roma güləşçisi Eldəniz Əzizli Serbiyanın paytaxtı Belqradda təşkil olunan dünya çempionatında finala yüksəlib.

Prosport.Az xəbər verir ki, 55 kq çəki dərəcəsində çıxış edən ikiqat dünya və ikiqat Avropa çempionumuz yarımfinalda İran təmsilçisi Puya Dad Marzla üz-üzə gəlib və 3:2 qalib gəlib..

Eldəniz Əzizli sabah qızıl medal uğrunda görüşə çıxacaq. Onun rəqibi 2019-cu ilin dünya çempionu Nuqzari Surtsumia (Gürcüstan) olacaq.