Səudiyyə Ərəbistanının paytaxtı Ər-Riyadda keçiriləcək III Ümumdünya Kombat Oyunlarında Azərbaycanı karatedə kimin təmsil edəcəyi müəyyənləşib.

Prosport.Az-ın xəbərinə görə, Ümumdünya Karate Federasiyası bu yarışda iştirak edəcək 21 yaşadək idmançıların siyahısını açıqlayıb.

20-21 oktyabr tarixlərində keçiriləcək karate yarışında Azərbaycanı Hüseyn Məmmədli təmsil edəcək. O, 67 kq çəki dərəcəsində çıxış edəcək.

Həmçinin, Prosport.Az olaraq digər idman növlərindən kimin Azərbaycanı bu multiidman yarışında təmsil edəcəyini müəyyənləşdirməyə çalışdıq. Daha əvvəl Eduard Məmmədovun tələbəsi olan "Ağ canavar" ləqəbli Amin Quliyevin ötən ilin noyabrında Türkiyənin Antalya şəhərində keçirilmiş kikboksinq üzrə Avropa çempionatının qalibi olmaqla bu yarışa lisenziya qazandığını xəbər vermişdik. Beləliklə, Azərbaycanı bu yarışda təmsil edəcək 11 idmançının adını təqdim edirik: 

Karate: Hüseyn Məmmədli (67 kq)
Kikboksinq: Amin Quliyev (60 kq)
Savat: Tutu İsmayılova (52 kq)
Qraplinq: Nadir İmaməliyev (84 kq), Hacımurad Purtiyev (92 kq)
Pankration: Əli Quliyev (66 kq), Əli Şərifov (71 kq), Türkmən Məmmədli (84 kq), Ramir Ağalarov (92 kq), Esmira Məmmədova (65 kq)
Uşu: Orxan Hətəmov (56 kq)

Bu yarışın proqramında 16 olimpiya və qeyri-olimpiya idman növləri var. Aykido, qol güləşi, boks, qılıncoynatma, cüdo, cü-citsu, karate, kendo, kikboksinq, muaytay, sambo, savat, sumo, taekvondo, güləş (yunan-Roma güləşi, qraplinq, pankration, kəmər güləşi) və uşu idman növləri Ümumdünya Kombat Oyunlarında təmsil olunacaq. Həmçinin, 3-cü dəfə təşkil olunacaq bu yarışın tarixində ilk dəfə fiziki, əqli və görmə məhdudiyyətli idmançılar aykido, muaytay, qol güləşi, cu-citsu, sambo and savat idman növlərində qüvvələrini sınamaq imkanı əldə edəcək. 80 ölkədən 1700 idmançının yarışacağı turnir 20-30 oktyabr tarixlərində keçiriləcək.