Ümumdünya Güləş Birliyi (UWW) əslən azərbaycanlı olan dünya çempionu Vitali Orucovla bağlı maraqlı paylaşım edib.

Prosport.Az xəbər verir ki, 61 kq çəki dərəcəsində Serbiyanın paytaxtı Belqradda ABŞ-nin sərbəst güləş millisi ilə dünya çempionu olan 24 yaşlı idmançının atasının da vaxtı ilə bu uğura imza atdığı xatırlanıb.

ABŞ-də Vito Arucau kimi tanınan idmançının atası Vüqar Orucov 48 kq-da SSRİ millisinin heyətində 32 il əvvəl – 1991-ci ildə Bolqarıstanın Varna şəhərində dünya çempionu olub. UWW ata-oğulun dünya çempionu olması kadrlarını yayıb.

Qeyd edək ki, Bakıda doğulan Vüqar Orucov SSRİ dağıldıqdan sonra Belarusa köçüb. Orucov əvvəlcə bu ölkənin, daha sonra Rusiyanın uğurları üçün çıxış edib. O, Rusiya millisi adından 1995-ci ildə dünya və Avropa çempionu olub, Dünya Kubokunu qazanıb.

Onu da bildirək ki, dünya çempionatında ata-oğul uğuru yunan-Roma güləşi üzrə millimizdə də var. Arif Niftullayev 1978-ci ildə 74 kq çəki dərəcəsində Meksikanın paytaxtı Mexikoda dünya çempionu olub. Onun oğlu və adaşı Arif Niftullayev isə ötən il Belqraddakı dünya çempionatında 97 kq-da bürünc mükafat qazanmaqla Azərbaycana bu çəkidə ilk medalı qazandırıb. O bugündən start götürəcək dünya çempionatının yunan-Roma güləşi üzrə yarışında da qüvvəsini sınayacaq və nəticəsini yaxşılaşdırmağa çalışacaq.