Argentinanın paytaxtı Buenos Ayresdə çimərlik güləşi üzrə Dünya Seriyasının ilk mərhələsi keçirilib.

Prosport.Az xəbər verir ki, 27 ölkənin təmsil olunduğu yarışda güləşçilərimiz 1 gümüş və 1 bürünc medal qazanıb.

Ramiz Həsənov (70 kq) B qrupunda panamalı Vilfrido Samanyexo, perulu Xon Kareno və venesuelalı Vilfredo Rodriqesə 3:0 hesabıyla qalib gəlib. 1/4 finalda dominikanlı Albaro Kamaçoya da eyni aqibəti yaşadan (3:0) Həsənov yarımfinalda türkiyəli Sərvət Coşkunla bacarmayıb – 0:4. Ramiz rumıniyalı Ştefan Komanı sonuncu xal prinsipinə əsasən (2:2) üstələyərək bürünc medala sahib çıxıb.

İbrahim Yusubov (90 kq) A qrupunda belçikalı Yonas van Kanexem (3:0), yunanıstanlı Xristos Samartsidis (3:2) və panamalı Elton Morisona (3:0) qalib gəlib. Yusubov 1/4 finalda fransalı Matis Mayranı, yarımfinalda isə macarıstanlı Patrik Pueşpoekini eyni hesabla (3:0) üstələyərək finala vəsiqə qazanıb. Həlledici görüşdə gürcüstanlı Dato Piruzaşviliyə minimal fərqlə (2:3) uduzan İbrahim gümüş medal qazanıb.

Oyan Nəzəriani (+90 kq) yunanıstanlı Axilles Xrisidisə (3:0) qalib gəlib və venesuelalı Xose Roberttiyə (0:2) məğlub olub. Son turda argentinalı Nikolas Baes güləşmədiyi üçün Nəzəriani də 1/4 finala adlayıb. Ancaq bu mərhələdə türkiyəli Fatih Yaşarlıya minimal fərqlə (1:2) məğlub olub.

Qeyd edək ki, Dünya Seriyasının II mərhələsi Sinqapurda (10-11 iyun) keçiriləcək.