Yunanıstanın Krit adasındakı Hersonissos şəhərində keçirilən səkkiz yaşdan 18 yaşadək şahmatçılar arasında Avropa çempionatına yekun vurulub.
Prosport.Az xəbər verir ki, 18 yaşadək qızların yarışında 1 tur əvvəl çempionluğu təmin edən Nərmin Abdinova son qarşılaşmada da qalib gəlib. O, FIDE təmsilçisi Lizaveta Lyaşkeviçi məğlub edərək 9 turu maksimum nəticə - 9 xalla tamamlayıb.
18 yaşadək oğlanların mübarizəsində Tunar Davudov son turda polşalı Pavel Sovinskini üstələyib. Xalını 7-yə çatdıran təmsilçimiz gümüş medal qazanıb.
8 yaşadək qızların yarışında isə Selin Məmmədova türkiyəli Eliz Karahana qalib gələrək bürünc medala sahib çıxıb.
Beləliklə, Azərbaycan şahmatçıları çempionatı 1 qızıl, 1 gümüş və 1 bürünc medalla başa vurublar. Komandamız ümumi hesabda 42 ölkə arasında 3-5-ci yerləri bölüşüb.
