"Gəncə" basketbol klubunun məşqçisi Rizvan Səfərov Azərbaycan Basketbol Liqasında "Neftçi"yə 94:96 hesabı ilə uduzduqları matçdan sonra fikirlərini bölüşüb.

Prosport.Az xəbər verir ki, mütəxəssis məğlubiyyətə baxmayaraq komandasının oyunundan razı qaldığını bildirib:

"Məğlub olmağımıza baxmayaraq, mübarizə əzminə görə oyunçulara təşəkkürümü çatdırıram. Basketbol adına hər iki tərəf layıqlı çıxış etdi. Komandamızın heyətində iki itki vardı - Əlibəy Məmmədli ilə Nik Ellinqton zədəlidir. Bu səbəbdən meydanda istədiyimiz rotasiyaları edə bilmədik. Bununla belə, uşaqlar qələbə əzmi ilə meydana çıxmışdılar. Hər bir oyunun sonu yeni mübarizənin başlanğıcı deməkdir. Qarşıda bizi Avropa Kubokunda Gəncədə "Sportinq" ilə matç gözləyir. Bu qarşılaşmaya səylə hazırlaşacağıq. Sonda rəqibi qələbə münasibətilə təbrik edirəm".

Qeyd edək ki, "Gəncə" - "Sportinq" oyunu oktyabrın 29-da, Gəncə İdman Sarayında baş tutacaq.