Dünya Güləş Birliyinin (UWW) prezidentinin adına aydınlıq gəlib.

Prosport.Az-ın xəbərinə görə, qurumun hazırkı rəhbəri serbiyalı Nenad Laloviç 3-cü dəfə bu posta seçilib.

O, daha 6 il müddətinə – 2032-ci ilədək bu postda qalacaq.

Qazaxıstanın paytaxtı Astanada keçirilən Konqresdə daha əvvəl onun rəqibi olan azərbaycanlı Namiq Əliyevin namizədliyini geri götürdüyü məlum olub. O daha əvvəl Laloviçin 3-cü dəfə prezidentliyinin qanunsuz olduğunu bildirərək onu məhkəməyə vermişdi.

Qeyd edək ki, 2013-cü ildə isveçrəli Rafael Martinettinin istefasından sonra onun yerinə müvəqqəti rəhbər kimi gəlmiş Nenad Laloviç 2014 və 2021-ci illərdə bu vəzifəyə seçilib.

Xatırladaq ki, Azərbaycan Güləş Federasiyasının (AGF) mərhum prezidenti Fazil Məmmədovun qudası olmuş Namiq Əliyev 2022-ci ilin aprelin 9-dək AGF-nın I vitse-prezidenti işləyib. O, son seçkiyədək UWW-də Büro üzvü, Əlaqəli Güləş Növləri Komitəsinin üzvü və Qrapplinq və Pankration Komitəsinin prezidenti kimi də fəaliyyət göstərib. Hazırda N.Əliyev Azərbaycan Gimnastika Federasiyasının vitse-prezidenti Altay Həsənovla yaxın əlaqələrinə görə sözügedən federasiyanın İcraiyyə Komitəsinin üzvü kimi fəaliyyət göstərir.