“Qarabağ” Futbol Akademiyasının Azərbaycan İdman Akademiyası (ASA) ilə əməkdaşlıq çərçivəsində həyata keçirdiyi “Futbol məşqçilərinin peşəkar inkişaf proqramı”nda tələbləri doğrultmayan məşqçilərlə yollar ayrılacaq".

Prosport.Az xəbər verir ki, bu sözləri “Qarabağ”ın baş direktoru Əmrah Çəlikəl Azərbaycan İdman Akademiyası (ASA) ilə əməkdaşlıq çərçivəsində həyata keçirilən “Futbol məşqçilərinin peşəkar inkişaf proqramı”nın yekunlarına həsr olunmuş tədbirdən sonra jurnalistlərə açıqlamasında deyib.

O, proqramda klubun akademiyasında çalışan 20-dən çox məşqçinin iştirak etdiyini bildirib: “Bu proqramın futbolumuza böyük fayda verəcəyinə inanırıq. Gələcəkdə də məşqçilər üçün yeni təlim proqramlarının təşkili və mövcud proqramın yenilənməsi nəzərdə tutulub. Klub yalnız sertifikatların verilməsi ilə kifayətlənmək niyyətində deyil və məşqçilərin peşəkar inkişafının davamlı olmasını istəyir”.

Baş direktor proqramın nəticələrinin qiymətləndirilməsi məsələsinə də toxunub. O bildirib ki, klubun əsas tələbi məşqçilərin təlim zamanı əldə etdikləri bilikləri mənimsəmələri və müəyyən edilmiş qiymətləndirmə meyarlarına cavab vermələridir: “Biz bütün məşqçilərimizdən 70-dən yuxarı bal toplamalarını gözləyirik. Bu tələbi yerinə yetirmələri üçün onlara Azərbaycan İdman Akademiyasının müəyyənləşdirdiyi qaydalara uyğun olaraq müəyyən sayda əlavə imkan veriləcək. Gözləntilərimizi doğrultmayan məşqçilərlə yollarımızı ayıracağıq”.