Ümumdünya Güləş Birliyinin Özbəkistanın paytaxtı Daşkənddə keçirdiyi pankration üzrə dünya çempionatında Azərbaycan idmançıları 2 medal qazanıb.

Prosport.Az-ın məlumatına görə, medal qazananlardan biri MMA-da da çıxışları ilə tanınan Əli Quliyevdir.

Pankrationun ənənəvi növündə keçirilən yarışda Əli Quliyev finaladək irəliləyib. 66 kq çəki dərəcəsində yarışan idmançımız yerli idmançı Ümidcan Eşmuradovu (Özbəkistan) 12:10, Məhəmməd Cavad Kayedqapı (İran) 13:6, yarımfinalda Ruslan Sarıyevi (Qazaxıstan) 12:11 məğlub edərək finala yüksəlib. O, finalda Koşen Akanova (Qazaxıstan) 0:12 uduzaraq gümüş medalla kifayətlənib.

Ənənəvi növdə qadınların yarışında Esmira Məmmədova bürünc medalın bir addımlığında büdrəsə də, elit növdə bu mükafata sahib çıxa bilib. O, Dana Yermaqambetova (Qazaxıstan) 17:11 hesabı ilə qalib gələrək bürünc medal qazanıb.

Qeyd edək ki, dünya çempionatına bu gün yekun vurulacaq.