"Rəqib haqqında yaxşı sözlər deyə bilərəm. Gənc komandadır. Çox yaxşı oynayırlar. Biz isə kifayət qədər hazır deyildik. 2-ci hissə bizim üçün problem idi. Onları gözəl oyuna görə ancaq təbrik etmək olar". 

Prosport.Az xəbər verir ki, bu sözləri "LANDAU Layns" klubunun kapitanı Ceyms Freyzer FIBA Avropa Kubokunun müntəzəm mövsümündə Bakıda İsveçrənin "Cenevrə Layns" komandası ilə ilk qrup matçından sonra deyib.

Amerikalı oyunçu 83:105 hesablı məğlubiyyəti şərh edib: "Biz hazırda fərqli və yeni komandayıq. Mənim durumum da keçən ilkindən fərqlidir. Bu il həm də Cordan Perkins var, parketdə olacağımız zamanı onunla yarı-yarı bölüşməliyik. Mən lider olaraq, uğursuzluğa düçar oldum. Komandamı yaxşı hazırlaya bilməmişdim, ardımca apara bilmədim. Amma ölüm günümüz deyil. Oyunun təkrarına baxıb, nəticə çıxaracağıq". 

O, "LANDAU Layns"la 2 illik müqavilə bağlamasının səbəbini açıqlayıb: "Mənim buradan çox xoşum gəlir, ona görə 2 illik müqavilə imzalamışam. Ciddi uğurlar olsa, Azərbaycan basketbolunun imicini dəyişə bilər. 15 ildir basketbolla məşğulam, bir çox ölkədə oynamışam. Məqsəd uğur qazanmaq, komandamı yüksəklərə qaldıra bilək və yeni nəsili arxamızca daşıya bilməkdir.