“Gəncə”nin baş məşqçisi Martin Knejeviç Azərbaycan Basketbol Liqasının ilk turunda “Ordu” üzərində 92:90 hesablı qələbəni şərh edib.

Prosport.Az xəbər verir ki, mütəxəssis komandasının çıxışından və azarkeşlərin dəstəyindən məmnun olduğunu bildirib:

“Bu gün komandamızla çox fəxr etdim və ümid edirəm ki, şəhərimiz də bununla qürur duydu. Azarkeşlərimiz bizə həqiqətən böyük dəstək oldular. Bu gün onlar səhvlərə baxmayaraq hücum etməkdən əl çəkməyən və hər zaman növbəti epizoda köklənən bir komanda gördülər”.

Knejeviç ilk hissənin komanda üçün uğurlu alınmadığını, lakin fasilədən sonra birlik nümayiş etdirərək qələbə qazandıqlarını vurğulayıb. Baş məşqçi diqqəti artıq qarşıdakı Avropa Kuboku matçına yönəltdiklərini də qeyd edib: “İlk hissə bizim üçün o qədər də yaxşı keçmədi, lakin birlik nümayiş etdirdik və 2-ci hissədə qələbə qazandıq. İndi isə artıq İstanbulda “Esenler Erokspor”a qarşı keçirəcəyimiz ilk Avropa Kuboku oyununa köklənirik”.