Tacikistan milli komandasının baş məşqçisi İqor Angelovski qarşıdakı yoldaşlıq görüşləri, o cümlədən Azərbaycan yığması ilə Bakıda keçirəcəkləri oyun barədə fikirlərini bölüşüb.
Prosport.Az xəbər verir ki, Tacikistan sentyabrın 23-də Bakıda Azərbaycan, sentyabrın 28-də Çinin Çuntsin şəhərində Fələstin, oktyabrın 6-da isə eyni şəhərdə Çin millisi ilə qarşılaşacaq.
Angelovski qarşıdakı 3 oyunu komanda üçün vacib mərhələ hesab edir: “Bizi son dərəcə vacib dövr gözləyir. Azərbaycan, Fələstin və Çin kimi güclü rəqiblərlə üç yoldaşlıq oyunu keçirəcəyik”.
Baş məşqçi iyunda Hindistanla oyunlar üçün dəvət alan, lakin budəfəki heyətə düşməyən futbolçuların da diqqətdən kənarda qalmadığını vurğulayıb. Onun sözlərinə görə, milli komandaya seçim prosesi açıq olaraq qalır və məşqçilər korpusu bu mərhələdə yeni taktiki variantları sınamaqla yanaşı, komanda daxilində rəqabəti artırmağa çalışır.
Angelovski qarşıdakı toplanışda U-20 millisindən bir neçə futbolçunun da əsas komandaya cəlb edildiyini açıqlayıb. O, gənclər yığmasını Asiya Kuboku-2027-nin final mərhələsinə vəsiqə qazanması münasibətilə təbrik edib.
Baş məşqçi hesab edir ki, Azərbaycan, Fələstin və Çinlə oyunlar gənc futbolçular üçün də böyüklər futbolunun tempini və təzyiqini hiss etmək baxımından əhəmiyyətli olacaq: “3 qarşılaşma onlar üçün yaxşı imkan olacaq ki, böyüklər futbolunun təzyiqini və sürətini hiss etsinlər. Bu mərhələdə əsas məqsədimiz Asiya Kuboku-2027 ərəfəsində taktiki uyğunlaşmanı və komandanın ruhunu gücləndirməkdir”.
Tacikistan millisinin hər üç oyunu səfərdə keçirəcəyi də baş məşqçinin diqqətindən yayınmayıb. Angelovski bunun komandanın daha mürəkkəb şəraitə uyğunlaşması, uzun uçuş və səfərlərin öhdəsindən gəlməsi baxımından ciddi sınaq olacağını bildirib. O, futbolçulardan tam hazırlıq, intizam və yüksək konsentrasiya tələb etdiyini söyləyib.
Angelovski, həmçinin “İstiqlol”un yarımmüdafiəçisi Ehsani Pəncşanbenin durumuna toxunub. Zədə səbəbindən bərpa prosesi keçən futbolçunun qarşıdakı oyunlarda iştirakı tibbi heyətin icazəsindən asılı olacaq.
Qeyd edək ki, Azərbaycan – Tacikistan oyunu sentyabrın 23-də Bakıda keçiriləcək. “Palms Sports Arena”da baş tutacaq qarşılaşma saat 20:00-da start götürəcək.